சுஷ்மா சோமா

சுஷ்மா சோமா (பி. 1987) கலைத்துறையில் சிறந்துவிளங்கும் இளையருக்கு அளிக்கப்படும் ஆக உயரிய விருதாகிய இளம் கலைஞர் விருது பெற்றவர். கணக்காய்வாளராகப் பயிற்சி பெற்றிருப்பினும், தம் தொழில் வாழ்க்கையைச் சிங்கப்பூரிலும் பிற நாடுகளிலும் கர்நாடக இசையைப் பயில்வதற்காகவும் பரப்புவதற்காகவும் அர்ப்பணித்துக்கொண்டவர்.

சுஷ்மா, சிறுவயதிலிருந்தே சிங்கப்பூர் இந்திய நுண்கலைக் கழகத்தில் இசை பயின்றவர். நன்யாங் தொழில்நுட்பப் பல்கலைக்கழகத்தில் கணக்கியல் இளநிலைப் பட்டப்படிப்பை முடித்ததும் முன்னணிக் கணக்கியல் நிறுவனம் ஒன்றில் சிலகாலம் பணியாற்றியபின், கர்நாடக இசையில் ஆழ்ந்த பயிற்சி பெற இந்தியாவுக்குச் சென்றார். தற்போது, புகழ்பெற்ற வயலின் கலைஞரும் இசைக்கலைஞருமான ஆர்.கே. ஸ்ரீராம்குமார் அவருக்குக் குருவாக வழிகாட்டுகிறார். 

தனியாகவும் கூட்டாகவும் அவர் பல மேடைகளில் தம் திறமையை வெளிப்படுத்தியுள்ளார். சிங்கப்பூரில் உள்ள எஸ்பிளனேடு, ‘தி எர்த்ஷாட் பிரைஸ் அவார்ட்ஸ்’, சென்னையில் உள்ள சங்கீத வித்வத் சபை, வாரணாசியில் நடக்கும் ‘மஹிந்தரா கபிரா விழா’ உள்ளிட்ட உலகப் புகழ்பெற்ற மேடைகளிலும் விழாக்களிலும் அவர் நிகழ்ச்சிகளை நடத்தியுள்ளார். ‘ஃபிஃபா உலகக் கிண்ணம் கத்தார் 2022’ காற்பந்தாட்டப் போட்டிகளின்போது, முன்னணி நடனமணி மைதிலி பிரகாஷுடன் இணைந்து பணியாற்றியுள்ளார். மேலும், பெரும்புகழ் பெற்ற அனுஷ்கா சங்கர் ஹாம்பர்க் நகரில் உள்ள எல்ப்ஃபில்ஹார்மனியில் ஏற்பாடு செய்திருந்த ரிஃபிளெக்டர் விழாவிலும் அவருடைய நிகழ்ச்சி இடம்பெற்றது. 

சுஷ்மா, அமெரிக்க இசையமைப்பாளரும் இசைக்கலைஞருமான ஆதித்ய பிரகாஷுடன் இணைந்து உருவாக்கிய ஹோம் இசைத்தொகுப்பு விமர்சகர்களின் பாராட்டைப் பெற்றது. "சுற்றுச்சூழல் மற்றும் வனவிலங்குகள் பற்றிய சிறந்த இசைத் தொகுப்புகளில் ஒன்று..." என்று மதிப்பிடப்பட்ட அத்தொகுப்பின் பாடல்கள் பி.பி.சி. வானொலி, ஸாங்லைன்ஸ் இதழ், ரோலிங் ஸ்டோன் இந்தியா, என்.ஹெச்.கே. ஜப்பான் ஆகிய ஊடகங்களிலும் இடம்பெற்றன. ‘தி எலிஃபண்ட்ஸ் ஃப்யூனரல்’ எனும் பாடலை 2022-ஆம் ஆண்டின் சிறந்த ஐந்து பாடல்களில் ஒன்றாக தி இந்தியன் எக்ஸ்பிரஸ் நாளிதழ் தேர்ந்தெடுத்தது. 

தம் கலைப்பணிக்கு அப்பால், சுஷ்மா சிங்கப்பூரின் தேசியக் கல்விக் கழகத்தில் பகுதிநேர விரிவுரையாளராகப் பணிபுரிகிறார். சிங்கப்பூர் பன்னாட்டுக் கலை விழா ஆலோசனைக் குழு உறுப்பினராகவும் இருக்கிறார். சிங்கப்பூர்த் தமிழ்ப் பண்பாட்டு மையத்திற்கு வித்திட்ட தமிழ் மின்னிலக்க மரபுடைமைக் குழுவுடன் இணைந்து, 2018-ஆம் ஆண்டில், சிங்கப்பூர்த் தமிழ் இசை மின்தொகுப்புப் பணிகளை அவர் வழிநடத்தினார். சுஷ்மாவின் தனித்துவமான திறமையையும் சமூக சேவையையும் பாராட்டி 2020-ஆம் ஆண்டில் அரசாங்கம் அவருக்கு இளம் கலைஞர் விருது வழங்கியது.



மேல்விவரங்களுக்கு
Seow, Latasha. “Youth in Action: Former Accountant on Mission to Promote Classical Indian Music.” Today, 17 November 2020. https://www.todayonline.com/singapore/youth-action-former-accountant-mission-promote-classical-indian-music
Young Artist Award 2020: Sushma Soma. National Arts Council. Accessed on 1 August 2025. https://www.nac.gov.sg/docs/default-source/singapore-arts-scene-files/young-artist-award/2020/sushma.pdf?sfvrsn=e05967fe_2

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.