சிங்கப்பூர் இந்திய நுண்கலைக் கழகம்

சிங்கப்பூர் இந்திய நுண்கலைக் கழகத்தை அமைக்கும் எண்ணம் 1949-இல் சவுத் பிரிட்ஜ் ரோட்டில் அமைந்திருந்த ஐந்தாவது குற்றவியல் நீதிமன்றத்தின் ‘சாட்சிகள் அறை’யில் உருவானது. அப்போதைய மூத்த நீதிமன்ற உரைபெயர்ப்பாளர்களான கே.பி.ஏ. மேனன், பி.ஆர். வி. சுப்பன், டி.வி. சுப்பராயலு ஆகியோர் அந்த அறையில் கலந்து பேசியபோதுதான் கழகத்தை உருவாக்க வேண்டும் என்னும் முடிவு எடுக்கப்பட்டது. பின்னர், எஸ்.என். துரை, ஆர்.பி. ஈஸ்வரன், வி. கோவலம், கே.பி.எ. மேனன், கே.சி. நடராஜன், எஸ். நடராஜன், ஜி.எஸ். ராமச்சந்திரன், ஈ.ஏ. ஷங்கர், பி.ஆர்.வி. சுப்பன், டி.வி. சுப்பராயலு ஆகியோரை நிறுவன உறுப்பினர்களாகக் கொண்டு கழகத்தைப் பதிவுசெய்ய முடிவு செய்யப்பட்டது. கே.சி. நடராஜனும், இன்னொரு ஆதரவாளரான ஆனந்த சுப்பராமனும் பதிவாளர் அலுவலகத்தில் கழகத்தைப் பதிவுசெய்யும் பொறுப்பை ஏற்றுக்கொண்டனர். கழகத்தின் முதல் முகவரி 132 ரங்கூன் ரோடு.

தொடக்கக்காலத்தில் உள்ளூர், வெளியூர்க் கலைஞர்களின் இசை, நடனக் கச்சேரிகளை நடத்துவது, இந்திய நாடக ஆசிரியர்களின் நாடகங்களை மேடையேற்றுவது போன்றவற்றில் கழகம் அதிகக் கவனம் செலுத்தியது. கழகத்தின் முதல் பரதநாட்டிய வகுப்புகள் 1951-இல் தொடங்கின. மலாயாவிலிருந்து வந்த நடன ஆசிரியர்கள் பகுதிநேரப் பயிற்றுவிப்பாளர்களாகப் பணியாற்றினர். பின்னர், 1959-இல், இந்திய நுண்கலைகளில், குறிப்பாக கர்நாடக இசையிலும் பரதநாட்டியத்திலும் ஆர்வமுள்ளோருக்கு வகுப்புகள் நடத்த ஒரு கலைப்பள்ளி அமைக்கப்பட்டது. அதன் நோக்கம், காலனித்துவக் கல்வியோடு பண்பாட்டுக் கல்வியை மாணவர்களுக்குப் புகட்டுவதும் சிங்கப்பூரில் பிறந்த இந்தியர்கள் தங்கள் பண்பாட்டு வேர்களுடன் தொடர்புகொண்டிருக்க உதவுதல். ஆறு மாணவர்களுடன் தொடங்கிய அக்கலைப்பள்ளி, 2021-ஆம் ஆண்டு மாணவர் எண்ணிக்கையில் 2000-ஐ எட்டியது. உயர்தரமான கலைக் கல்வியை வழங்குவதோடு இந்தியக் கலைகள் குறித்த புரிதலையும் ரசனையையும் வளர்ப்பது கழகத்தின் நோக்கம். கழகத்தின் முதல் பொது நிகழ்ச்சியாக ரவீந்திரநாத் தாகூரின் ஆங்கில நாடகமான Sacrifice அரங்கேறியது. அதனைத் தொடர்ந்து தமிழ் நாடகங்கள் மேடையேறின. கழகம் 2003-ஆம் ஆண்டுமுதல் இந்தியக் கர்நாடக இசை, நடன நிகழ்ச்சியை (தற்போது அது கலை விழா என்று அழைக்கப்படுகிறது) வருடந்தோறும் நடத்தி வருகிறது. சில வாரங்கள் நீடிக்கும் இவ்விழாவில் புகழ்பெற்ற அனைத்துலகக் கலைஞர்களும் உள்ளூர்க் கலைஞர்களும் பங்கு பெறுவர். மேலும் 2022-இல் கழகம் ஒரு தயாரிப்பு நிறுவனத்தைத் தொடங்கியது. உள்ளூர்க் கலைஞர்களுக்கு ஓர் அனைத்துலக மேடையை அமைத்துத் தருவதுடன் உள்ளூர்க் கலைத்துறையுடன் பல்வேறு வழிகளில் இணைந்து செயற்பட்டும் வருகிறது. 

தொடக்க ஆண்டுகள் சிரமமானவையாக இருந்தாலும் அரசாங்கத்தின் ஆதரவால் 1980-களில் கழகம் நல்ல வளர்ச்சி கண்டது. அதன் பலனாக உள்ளூர்ப் பண்பாட்டு மையம் என்னும் தனது நிலையை வலுப்படுத்திக்கொண்டதோடு சிங்கப்பூரைக் கலைகளுக்கான உலகளாவிய நகரமாக உருமாற்றுவதிலும் குறிப்பிடத்தக்க பங்காற்றியது. இந்தியக் கலைகளுக்கான தலையாய நிறுவனமாகச் செயல்பட்டு வருவதுடன் கலை, அழகியல் சார்ந்த பங்களிப்புகளால் மேம்பட்ட சமூகத்தை உருவாக்கும் தொலைநோக்குடன் கழகம் தொண்டாற்றுகிறது. அனைத்துத் தலைமுறையினருக்கும் இனத்தினருக்கும் இந்தியக் கலைகளை அறிமுகம் செய்வதும், கலை மேம்பாட்டிற்காகப் புத்தாக்கங்களுடன் தொழில்நுட்பத்தையும் அரவணைத்துச் செல்வதும், சிங்கப்பூரின் பல்வேறு தனித்துவமிக்க பண்பாட்டுப் பாரம்பரியங்களுக்குப் பங்களிப்பதும் கழகத்தின் இலக்கு. மேலும், கழகம் சிங்கப்பூரில் மட்டுமின்றி, அதன் சுற்றுவட்டாரங்களிலும் உலகளவிலும் இந்தியக் கலைச் சமூகத்தைக் கட்டமைக்கவும் இணைக்கவும் முயன்றுவருகிறது.



மேல் விவரங்களுக்கு
Singapore Indian Fine Arts Society. Accessed 1 August 2025. https://www.sifas.org/ 
“Singapore Indian Fine Arts Society", SIFAS, Youtube. n.d. https://www.youtube.com/c/SingaporeIndianFineArtsSociety-SIFAS
Singapore Indian Fine Arts, A growing rhythm : the story of the Singapore Indian Fine Arts Society.Ahmedabad : Mapin Publications, 1998. (Call no. 706.05957 GRO -[SRN])
Singapore Indian Fine Arts, Kala Manjari : fifty years of Indian classical music and dance in Singapore. [Singapore] : Sun Media Pte Ltd for the Singapore Indian Fine Arts Society, [2015]. (Call no.780.899141105957 KAL) 
"Singapore Indian Fine Arts Society", SIFAS, Facebook. n.d. https://www.facebook.com/sifas.org
"Singapore Indian Fine Arts Society", SIFAS, Instagram. n.d. https://www.instagram.com/wearesifas/

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.