இந்திய மரபுடைமை நிலையம்

தேசிய மரபுடைமைக் கழகத்தால் நிர்வகிக்கப்படும் ஒரு மரபுடைமைப் பராமரிப்பு நிறுவனமான இந்திய மரபுடைமை நிலையம், சிங்கப்பூரிலும் தென்கிழக்கு ஆசியாவிலும் இந்திய, தெற்காசிய சமூகங்களின் வரலாற்றைப் பதிவுசெய்வதற்காக அர்ப்பணிக்கப்பட்டுள்ளது. அப்போதைய பிரதமர் லீ சியன் லூங் 7 மே 2015 அன்று திறந்துவைத்த நிலையம், அச்சமூகங்கள் தம் பன்முகப் பண்பாட்டுப் பாரம்பரியத்தைப்பற்றி அறிந்துகொள்ள ஒரு மையமாகச் செயல்பட இலக்கு வைத்துள்ளது. 

சிங்கப்பூர் தேசிய அரும்பொருளகமும் ஆசிய நாகரீக அரும்பொருளகமும் விவரிக்கும் இந்திய மரபுடைமை வரலாற்றை முழுமைப்படுத்தும் விதமாக அமையும் நிலையத்தின் பணி, இரண்டு நூற்றாண்டுகளாக இந்திய, தெற்காசியச் சமூகங்களின் புலம்பெயர் பயணத்தை விரிவான சிங்கப்பூர் வரலாற்றின் ஒருங்கிணைந்த பகுதியாக அதன் பன்முகப் பண்பாட்டுக் கட்டமைப்பில் நிலைபெறச் செய்கிறது. லிட்டில் இந்தியாவின் இதயப் பகுதியில் அமைந்துள்ள நிலையம், வரலாற்று மதிப்புமிக்க அவ்வட்டாரத்தில் காணவும், கேட்கவும், நுகரவும் கிட்டும் அனுபவங்களை ஆராய்வதற்கான ஒரு தளமாகவும் செயல்படுகிறது.

இந்திய மரபுடைமை நிலையம் பல ஆண்டுகளாகப் பெற்ற சமூக நன்கொடைகள் வழியாகவும் இரவல் பெற்றும் வரலாற்றுப் பொருள்களின் சேகரிப்பை விரிவாக வளர்த்துள்ளது. அதில் சிங்கப்பூரின் இந்திய மக்கள்தொகையில் ஆகப்பெரிய சமூகமான தமிழ்ச் சமூகத்தைப் பிரதிநிதிக்கும் சுமார் 400 பொருள்கள் உள்ளன. தொடக்கக்காலத் தமிழ் முன்னோடிகளின் புகைப்படங்கள், தனிப்பட்ட நினைவுப் பொருள்கள் நிலையத்தின் நிரந்தரக் காட்சியகங்களில் இடம்பெற்றுள்ள அப்பொருள்கள், சிங்கப்பூர் இந்தியர், தெற்காசியர் ஆகியோரின் பூர்விகம், புலப்பெயர்வு, குடியேற்றம், பங்களிப்பு, தமிழ் அச்சிதழ்கள், கல்வி, அமைப்புகள் தொடர்பான ஆவணங்கள் ஆகியவை அவற்றுள் அடங்கும். ஸ்ரீ தெண்டாயுதபாணி கோயிலில் இருந்து ஒரு காவடி, கோ. சாரங்கபாணியின் சிங்கப்பூர்க் குடியுரிமைச் சான்றிதழ், ஞானப்பிரகாசம் பிள்ளைக்குச் சொந்தமான இருபதாம் நூற்றாண்டுக் காசுமாலை ஆகியவை குறிப்பிடத்தக்கவை. அவை வெளிப்படுத்தும் ஐந்து கருப்பொருள்களில் வகைப்படுத்தப்பட்டுள்ளன. முக்கியத் தமிழ்ப் பண்டிகைகளும் சடங்குகளும் பதிவுசெய்யப்பட்டுள்ள காணொளிகள், மின்னிலக்க இருவழித் தொடர்புமூலம் கற்கும் பகுதிகள், தமிழ்ச் சமூக மூத்தோரின் வாய்மொழி வரலாறுகள் ஆகியவையும் காட்சியகங்களில் இடம்பெற்றுள்ளன. மேலும், நிலையத்தின் சேகரிப்புகளைக்கொண்டு, தொடக்கநிலை ஐந்தில் படிக்கும் மாணவர்களுக்கான அரும்பொருளகம் சார்ந்த கற்றல் திட்டம் ஒன்றும் கல்வி அமைச்சுடன் இணைந்து உருவாக்கப்பட்டுள்ளது. அதன்வழியாகத் தமிழ்ப் பண்பாட்டையும் சிங்கப்பூர்த் தமிழ்ச் சமூகத்தின் பங்களிப்புகளையும் அறிவதோடு பரந்த இந்தியச் சமூகத்தைக் குறித்தும் மாணவர்கள் கற்றுக்கொள்ளமுடிகிறது. காட்சியகங்களை ஆங்கிலம், தமிழ் இருமொழிகளிலும் வழிகாட்டிகளின் துணையுடன் சுற்றிப்பார்க்க ஏற்பாடு செய்துள்ள நிலையம், காட்சியகக் கையேடுகள், விளக்கப் பட்டிகள், நிலையத்தின் புத்தக வெளியீடுகள் உள்ளிட்ட பல்வேறு உள்ளடக்கங்களைத் தமிழில் தயாரிக்கிறது.

சிங்கப்பூரின் இருநூற்றாண்டு நிறைவு விழாவையும் சிங்கப்பூரில் தமிழர்களின் 200 ஆண்டு நிறைவையும் நினைவுகூரும் வகையில், 2019-இல், சோழமண்டலக் கரை முதல் மலாக்கா நீரிணை வரை: நம் தமிழ் மரபு குறித்த மறுபார்வை என்ற அதன் நான்காவது சிறப்புக் கண்காட்சியை நிலையம் தொடங்கியது. அது, கடந்த சுமார் ஈராயிரம் ஆண்டுகளாக, சோழமண்டலக் கடற்கரைப் பகுதியைச் சேர்ந்த தமிழர்களுக்கும் தென்கிழக்கு ஆசியாவுக்கும் இடையிலான தொடர்புகளை ஆராய்ந்து, சிங்கப்பூரில் தமிழர்களின் வரலாற்றையும் அவர்களின் வாழ்க்கை, பண்பாடு, 200 ஆண்டுகளுக்கும் மேலான பங்களிப்பு ஆகியவற்றையும் எடுத்துக்காட்டியது. நிலையம், கொள்கை ஆய்வுக் கழகத்துடன் இணைந்து, ஊர் திரும்பியவர், வேர் ஊன்றியவர்: தென்கிழக்காசியாவிலும் சிங்கப்பூரிலும் தமிழர் என்னும் புத்தகத்தின் ஆங்கில, தமிழ்ப் பதிப்புகளையும் வெளியிட்டது. புத்தகம், தமிழ் வட்டாரங்களுக்கும் தென்கிழக்கு ஆசிய அரசுகளுக்கும் இடையிலான வரலாற்றுத் தொடர்புகளை, நவீன சிங்கப்பூரின் தமிழ் வரலாறு,  பன்முகத்தன்மை ஆகியவற்றின் குறைவாக அறியப்பட்ட அம்சங்களுடன் விவாதிக்கிறது.

இந்திய மரபுடைமை நிலையம் துடிப்புடன் செயலாற்றி, சிங்கப்பூரில் தமிழ்ப் பாரம்பரியத்தைச் செழிக்கச் செய்யும் பல்வேறு திட்டங்களை முன்னெடுப்பதுடன் கற்றல் வளங்களையும் உருவாக்குகிறது. நிலையத்தின் வருடாந்திரப் பொங்கல் விழா ஒரு முக்கிய எடுத்துக்காட்டு. விழாவின் கொண்டாட்டங்கள் பார்வையாளர்களுக்கு ஒரு சிறந்த அனுபவத்தை வழங்குவதோடு, சிங்கப்பூர்த் தமிழ்ச் சமூகத்தின் தனித்துவமான பழக்கவழக்கங்களையும் மரபுகளையும்  புரிந்துகொள்ள உதவுகின்றன. மேலும், விழா குறித்த விழிப்புணர்வை அதிகரிக்கவும் அதிகமான ஆர்வலர்களைச் சென்றடையவும் நடமாடும் கண்காட்சிகளையும் நிலையம் ஏற்பாடு செய்கிறது.



மேல்விவரங்களுக்கு
Indian Heritage Centre. Accessed on 1 August 2025. https://www.indianheritage.gov.sg/en 
“Indian Heritage Centre.” Roots. Accessed on 1 August 2025. https://www.roots.gov.sg/places/places-landing/Places/museums/indian-heritage-centre 
“Indian Heritage Centre - Our Community Treasure.” Roots. Accessed on 1 August 2025. https://www.roots.gov.sg/stories-landing/stories/indian-heritage-centre-our-community-treasure/story 
“Indian Heritage Centre Media Factsheet.” National Archives of Singapore. Accessed on 1 August 2025. https://www.nas.gov.sg/archivesonline/data/pdfdoc/20150516001/ihc_and_galleries_factsheet_-_final.pdf

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.