வளர்தமிழ் இயக்கம்

சிங்கப்பூரின் தமிழ் பேசும் சமூகத்தினரிடையில், குறிப்பாக இளம் தமிழ்ச் சிங்கப்பூரர்களிடையில், தமிழ் மொழி பற்றிய உணர்வையும் பயன்பாட்டையும் வளர்ப்பது வளர்தமிழ் இயக்கத்தின் நோக்கம். அந்த இயக்கம் அமைக்கப்படப்போவதை 12 மே 1999 அன்று, அப்போதைய சட்ட, வெளியுறவு அமைச்சர் எஸ். ஜெயகுமார் அறிவித்தார். இயக்கத்தின் ஆலோசகராக நாடாளுமன்ற உறுப்பினர் எஸ். ஈஸ்வரனை அவர் நியமித்தார். அதைத் தொடர்ந்து, 24 ஏப்ரல் 2000 அன்று வளர்தமிழ் இயக்கம் நிறுவப்பட்டது. தன் நோக்கத்தை நிறைவேற்ற வளர்தமிழ் இயக்கம், மற்ற இந்திய அமைப்புகள், பள்ளிகள், சமூகப் பங்காளிகளோடு அணுக்கமாகச் செயல்படுகிறது. தமிழ்ச் சமூகத்தின் முக்கிய நிகழ்வாக உருவாகியிருக்கும் தமிழ் மொழி விழா வளர்தமிழ் இயக்கத்தால் 2007-இல் தொடங்கப்பட்டது. இவ்விழாவில், “தமிழை நேசிப்போம், தமிழில் பேசுவோம்” எனும் முழக்கவரிக்கு ஏற்ப நிகழ்ச்சிகள் படைக்கப்படுகின்றன. இலக்கியச் சொற்பொழிவுகள், பண்பாட்டு நிகழ்ச்சிகள் பெரிதும் இடம்பெறுகின்றன. வளர்தமிழ் இயக்கம் 2017-இல் திறன் மேம்பாட்டுத் திட்டத்தை அறிமுகப்படுத்தியது. சிறுவர், இளையருக்கிடையில் தமிழ் மொழியின் வளர்ச்சியிலும் முன்னேற்றத்திலும்  கவனம் செலுத்த அமைப்புகளுக்கு ஊக்கமளிப்பது இத்திட்டத்தின் நோக்கம்.

இயக்கத்தின் மற்றுமொரு பெரும் பங்களிப்பு, 2018-இல், தேசிய மொழிபெயர்ப்புக் குழுவின் தமிழ் மொழிவளக் குழுவோடு இணைந்து, சிங்கப்பூரில் பயன்படுத்துவதற்குரிய தமிழ்ச் சொற்களின் தொகுப்பை உருவாக்கியதாகும். இந்தத் தொகுப்பு “சொல்வளக் கையேடு” என்ற தலைப்பில் நூல் வடிவில் வெளியிடப்பட்டது. வளர்தமிழ் இயக்கம் அதன் முதல் 20 ஆண்டுகளில் செய்த அனைத்துச் சாதனைகளையும் ஆவணப்படுத்தும் “நமது பயணம் (2000-2020): தமிழை நேசிப்போம், தமிழில் பேசுவோம்” என்ற தலைப்பிலான நூல், 2021-இல் வெளியிடப்பட்டது. அதே ஆண்டில், தமிழ் இளையர் விழாவையும் வளர்தமிழ் இயக்கம் தொடங்கி வைத்தது. இளையர்கள் சக இளையருக்காகத் தமிழ் மொழி நிகழ்ச்சிகளைப் படைப்பதற்கான தளமாக இவ்விழா திகழ்கிறது. வளர்தமிழ் இயக்கம் மேலும் சுவையான, புதுமையான, பொருத்தமான நிகழ்ச்சிகளை வழங்கும் நோக்கில் இன்னும் அதிகமான அமைப்புகளை ஈடுபடுத்தத் தொடர்ந்து முயற்சி எடுத்துவருகிறது.



மேல்விவரங்களுக்கு
“Love Tamil, Speak Tamil.” Tamil Language Council. Accessed 1 August 2025. https://www.languagecouncils.sg/tamil/en 
“Glossary of English to Tamil Terms.” National Translation Committee. Accessed 1 August 2025. https://www.languagecouncils.sg/tamil/en/-/media/tlc/files/english-to-tamil-glossary-book.pdf 
Tamil Language Council. Our Journey (2000-2020): Love Tamil, Speak Tamil. Edited by Prasanna Nair, Prakas Nair, and Divya Radhakrishnan. Singapore: Tamil Language Council, 2021.

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.