தேசிய மொழிபெயர்ப்புக் குழு

தேசிய மொழிபெயர்ப்புக் குழு பொதுவெளியில் தமிழைப் பயன்படுத்துவதில் குறிப்பிடத்தக்க பங்காற்றியுள்ளது. அரசாங்கம் முழுவதிலும் ஆங்கிலம், சீனம், மலாய், தமிழ் ஆகிய நான்கு அதிகாரத்துவ மொழிகளிலும் மொழிபெயர்ப்புத் திறன்களை மேம்படுத்துவதற்கான குறுகிய, நீண்டகாலத் திட்டங்களை மேற்பார்வையிடுவதற்காக, 1 மார்ச் 2014 அன்று, தொடர்பு, தகவல் அமைச்சால் அந்தக்குழு அமைக்கப்பட்டது. தனியார் துறையிலும் மொழிபெயர்ப்புத் தரத்தை மேம்படுத்துவதைக் குழு நோக்கமாகக் கொண்டுள்ளது.

அக்குழுவின் பணி பொது, தனியார், மக்கள் துறைகளை உள்ளடக்கிய ஒரு கூட்டு முயற்சியாகும். குழுவில் ஊடகம், கல்வித்துறை, மொழிபெயர்ப்புத்துறை, அரசாங்க அமைப்புகள் ஆகியவற்றைச் சேர்ந்த உறுப்பினர்கள் உள்ளனர். பல்வேறு அரசாங்கத் தகவல்தொடர்புகளில் தமிழில் பல தவறான மொழிபெயர்ப்புகள் வெளிவந்ததைத் தொடர்ந்து, பிரச்சினையை ஆராய அரசாங்கத்தால் ஓர் ஆய்வுக்குழு அமைக்கப்பட்டது. உயர்தர மொழிபெயர்ப்புகள் பயனுள்ள தகவல்தொடர்புக்கு முக்கியம் என்பதோடு, பல்வேறு இனச் சமூகங்கள் மதிக்கப்படுவதைக் காட்டுவதற்கும் அவசியம் என்பதையும் அக்குழுவின் கணிப்புகள் வலியுறுத்தின.

அந்த ஆய்வின் விளைவாக, மொழிபெயர்ப்புச் சேவைகளையும் சரிபார்த்துத் திருத்தும் சேவைகளையும் பெறுவதற்கு அரசாங்கம் முழுவதற்கும் குறிப்பிட்ட காலத்துக்கான ஒப்பந்தம் மற்றும் பொது உடன்படிக்கை நடைமுறை செயற்படுத்தப்பட்டது. சிங்கப்பூரில் மொழிபெயர்ப்பின் தரத்தையும் மொழியின் தரத்தையும்  உயர்த்துவதற்கான முயற்சிகளின் ஒரு பகுதியாக அரசாங்கம் தன்னார்வலர்களையும் ஈடுபடுத்தியது. மொழியிலும் மொழிபெயர்ப்பிலும் ஆர்வமுள்ள தன்னார்வத் தொண்டர்களுக்கு "குடிமக்கள் மொழிபெயர்ப்பாளர்”களாகச் சேருமாறு தொடர்பு, தகவல் அமைச்சு அழைப்பு விடுத்தது. அவர்கள் அரசாங்கத் தகவலேடுகள், அறிவிப்புகள் முதலியவைபற்றிக் கருத்துத் தெரிவித்தல், சரிபார்த்தல், பிழைதிருத்துதல் ஆகியவற்றில் ஈடுபடுகின்றனர். அண்மையில் Government Terms Translated இணையப் பக்கத்தில் தமிழிலும் இதர அதிகாரத்துவ மொழிகளிலும் மொழிபெயர்க்கப்பட்ட 660 அரசாங்கம் சார்ந்த சொற்றொடர்கள் வெளியிடப்பட்டுள்ளன. இது அரசாங்க அமைப்புகளும் பொதுமக்களும் துல்லியமான, சீரான மொழிபெயர்ப்புகளை வழங்குவதை எளிதாக்குகிறது.



மேல் விவரங்களுக்கு 
Ministry of Digital Development and Information. "Translation,"Accessed 1 August 2025. https://www.mddi.gov.sg/what-we-do/public-comms-and-engagement/translation/
SG Translate Together. Accessed 1 August 2025. https://www.sgtranslatetogether.gov.sg/about

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.