அழகுநிலா

அழகுநிலா (பி. 1974) சிங்கப்பூர் இலக்கியப்பரிசு பெற்ற எழுத்தாளர்களுள் ஒருவர். சிறுகதை, சிறார் இலக்கியம், கவிதை, கட்டுரை உள்ளிட்ட பல்வேறு இலக்கிய வகைமைகளில் படைப்புகளை வெளியிட்டுள்ளார்.

இந்தியாவிலுள்ள செண்டாங்காடு கிராமத்தில் பிறந்த அழகுநிலா, தமிழ் நாட்டில் முதுநிலைப் பொறியியல் பட்டம் பெற்று இயந்திரவியல் துறையில் பணியாற்றினார். சிங்கப்பூருக்கு 2005-இல் புலம்பெயர்ந்தார். தங்கமீன் கலை இலக்கிய வட்டம், சிங்கப்பூர்த் தமிழ் எழுத்தாளர் கழகம், வாசகர் வட்டம் உள்ளிட்ட உள்ளூர் இலக்கிய அமைப்புகளின் மாதாந்திரச் சந்திப்புகளில் கலந்துகொண்டு வாசிப்பு, விமர்சனம், படைப்பு ஆகியவற்றில் ஈடுபட்டார். எழுத்தாளர் ஜெயமோகனை ஆதர்சமாகக் கொண்ட இவரது படைப்புகள் தமிழ் முரசு, தி சிராங்கூன் டைம்ஸ் முதலிய உள்ளூர் இதழ்களிலும் பல்வேறு இணைய இதழ்களிலும் வெளிவந்துள்ளன. அழகுநிலாவின் முதல் நூலான ஆறஞ்சு சிறுகதைத் தொகுப்பு 2015-இல் வெளியானது. சிறுகாட்டுச் சுனை (2018) முதலிய கட்டுரைத் தொகுப்பு நூல்களையும் தோற்ற கவிதைகள் (2022) என்னும் மின்னூல் கவிதைத் தொகுப்பையும் வெளியிட்டுள்ளார். 

உள்ளூர் சிறார் இலக்கியச்சூழலை மேம்படுத்தும் வகையில், சிங்கப்பூர்ப் புத்தக மன்றத்தின் சொற்களுக்கு அப்பால் திட்டத்தின்கீழ் தேர்ந்தெடுக்கப்பட்டு வெளியிடப்பட்ட கொண்டாம்மா கெண்டாமா (2016) முதலிய சிறார் இலக்கிய நூல்களையும் இருமொழிக் கல்விக்கான லீ குவான் யூ நிதி ஆதரவு பெற்று உயிரோவிய வடிவில் சிறுவர் பாடல்களையும் (2024) வெளியிட்டுள்ளார். மேலும், சிறாரின் இலக்கிய வாசிப்பு, எழுத்து ஆர்வத்தை அதிகரிக்கத் தேசிய நூலக வாரியத்தின் தன்னார்வலராக குழந்தைகளுக்கான கதைசொல்லல், மாணவர்களுக்கான சிறுகதைப் பட்டறைகள் ஆகியவற்றையும் நடத்தி வருகிறார். தேசியக் கலை மன்றத்தின் முன்னெடுப்பான சங்கம் இல்லம் உறைவிடக் கல்வித் திட்டத்தின்கீழ் முதல் தமிழ் உடனுறை எழுத்தாளராக 2022-இல் தேர்ந்தெடுக்கப்பட்டார். 

அழகுநிலா தமது மொழிவழிக் கனவு (2021) நூலுக்காக 2022ஆம் ஆண்டிலும் சங்கம் இல்லம் பங்கேற்பின்போது எழுதிய அப்பன் (2023) நூலுக்காக 2024ஆம் ஆண்டிலும் படைப்பாக்க அம்ச அபுனைவுப் பிரிவில் சிங்கப்பூர் இலக்கியப் பரிசை வென்றார். 



மேல்விவரங்களுக்கு
“Season 15 (2022-2023).” Sangam House. Accessed on 1 August 2025. https://www.sangamhouse.org/season-15/#
“அழகுநிலா.” Tamil Wiki. Accessed on 1 August 2025. https://tamil.wiki/wiki/அழகுநிலா
“அழகுநிலா.” WordPress.com. Accessed on 1 August 2025. https://azhagunila.wordpress.com/
அழகுநிலா செந்தில்நாதன். YouTube Channel. Accessed on 1 August 2025. https://www.youtube.com/@Azhagunila-Singapore 
Singai Chittukkal. YouTube Channel. Accessed on 1 August 2025. https://www.youtube.com/@SingaiChittukkal

To read in English 

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.