தமிழ்மொழி கற்றல் வளர்ச்சிக் குழு

கல்வி அமைச்சு, 2005-ஆம் ஆண்டில், மேற்கொண்ட தமிழ்மொழிப் பாடத்திட்டம் கற்பித்தல்முறை மறு ஆய்வுக்குழுவின் முக்கியப் பரிந்துரை தமிழ்மொழி கற்றல் வளர்ச்சிக்குழுவின் தோற்றத்திற்கு வித்திட்டது. சிங்கப்பூரில் தமிழைத் தொடர்ந்து வாழும் மொழியாக நிலைக்கச் செய்ய எதிர்காலச் சந்ததியரிடையே தமிழ்மொழி கற்றலிலும் பயன்பாட்டிலும் ஆர்வத்தை வளர்க்க வழிவகை செய்யும் நோக்கில் இல்லம், பள்ளி, சமூகம் என்னும் முத்தரப்பின் ஒருமித்த கூட்டுறவு அவசியமென உணரப்பட்டது.  அதன் அடிப்படையில், 2006-ஆம் ஆண்டு அமைச்சர் எஸ். ஈஸ்வரன் தலைமையில் அக்குழு அமைக்கப்பட்டது. தமிழ் மாணவரிடையே தமிழ்மொழிப் பயன்பாட்டையும் கற்றலையும் மேம்படுத்தி மொழி, இலக்கியம் பண்பாடு முதலான கூறுகளில் ஈடுபாட்டை வளர்க்கச் செய்வதை நோக்கமாகக் கொண்டு செயற்பட்டது அக்குழு. குழுவில் மூத்த கல்வியாளர்கள் செயலவை உறுப்பினர்களாகவும் தமிழ் அமைப்புகளின் தலைவர்களும் ஊடகப் பிரதிநிதிகளும் சமூக ஆர்வலர்களும் உறுப்பினர்களாகவும் இடம் பெற்றுள்ளனர்.

கல்வி அமைச்சின் நிதியாதரவைக் கொண்டு இயங்கிவரும் குழு, ‘நாவில் தமிழ்; நாளும் தமிழ்’ என்னும் முழக்க வரியுடன் ஆண்டு முழுமையும் மொழி மேம்பாட்டுத் திட்டங்களை ஏற்பாடு செய்தும் பல திட்டங்களுக்கு ஆதரவு அளித்தும் வருகின்றது. அவற்றூள் ஒன்று, 2025-இல் வெளியிடப்பட்ட இந்த சிங்கப்பூர்த் தமிழர் கலைக்களஞ்சியம். மேலும், வளர்தமிழ் இயக்கத்தோடு ஒன்றிணைந்து ஆண்டுதோறும் தமிழ் மொழி விழாவில், ஏப்ரல் முழுதும்,”தமிழ்மொழி மாதம்” கொண்டாடுவதில் அதன் பங்களிப்பைத் தொடர்ந்து வழங்கிவருகின்றது. கலாசார, சமூக, இளையர் அமைச்சு, மனிதவள அமைச்சு ஆகியவற்றின் துணை அமைச்சர் தினேஷ் வாசு தாஸ், 2025-இல் குழுவின் தலைமைப் பொறுப்பை ஏற்றார்.

மேல் விவரங்களுக்கு
"நாவில் தமிழ்; நாளும் தமிழ்". தமிழ்மொழி கற்றல் வளர்ச்சிக் குழு. Accessed on 1 August 2025. https://www.tllpc.sg
தமிழ்மொழி கற்றல் வளர்ச்சிக் குழு. நாவில் தமிழ் நாளும் தமிழ் - 15வது ஆண்டு நினைவு புத்தகம். சிங்கப்பூர் : தமிழ்ம்மொழி கற்றல் வளர்ச்சிக் குழு, 2021

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.