சித்ரா ராஜாராம்

சித்ரா ராஜாராம் (பி. 1965), தமிழ் முரசு நாளிதழின் முதல் பெண் பத்திரிகை ஆசிரியர் என்னும் சிறப்புக்குரியவர். வானொலி, தொலைக்காட்சி ஊடகங்களில் தலைமைத்துவப் பணியாற்றியவர். தமிழ், ஆங்கில மொழி ஊடகங்களுக்கு அப்பால் மலாய் ஊடகப் பொறுப்பாளராகவும் பணியாற்றியவர். ஊடகம் தொடர்பான கல்வித் துறையிலும் பங்களித்திருப்பவர்.

சித்ரா, வணிக நிர்வாகத்தில் இளநிலை, முதுநிலை, முனைவர் பட்டங்களைப் பெற்றவர். ஆங்கில நாளிதழான நியூ பேப்பர் தொடங்கப்பட்ட காலத்தில் 1987 முதல் 1991 வரை செய்தியாளராகப் பணியாற்றிய அவர் தொடர்ந்து பிஸினஸ் டைம்ஸ் நாளிதழில் மூத்த அரசியல் செய்தியாளராக அனுபவம் பெற்றார்.

பின்னர் நீ ஆன் பலதுறைத் தொழிற்கல்லூரியின் ஊடகம், செய்திப் பிரிவில் விரிவுரையாளராகவும் தலைவராகவும் 1991 முதல் 1996 வரை பணியாற்றிவிட்டு 1996-இல் தமிழ் முரசு நாளிதழின் இணை ஆசிரியராகச் சேர்ந்தார். தமிழ் முரசு ஆசிரியராகப் பணிபுரிந்த காலத்தில் (1998 - 2005) இதழை, இளைய, சமகாலச் சமூகத்துடன் மேலும் பிணைக்கும் வகையில் அதன் அணுகுமுறையையும் செயற்பாடுகளையும் மறுசீரமைத்தார். தமிழ் முரசு இணையப் பதிப்பு அவர் காலத்தில்தான் தொடங்கப்பட்டது.

மேலும், மிகச்சிறந்த தமிழாசிரியர்களைக் கௌரவிக்கும் பொருட்டு, ‘நல்லாசிரியர் விருது’த் திட்டத்தை 2002-இல் தொடங்கினார். தமிழ் முரசு நிறுவனர் கோ. சாரங்கபாணியின் நூற்றாண்டு விழாவை முன்னிட்டு, வசதிகுறைந்த மாணவர்களுக்கு உதவ 2003-இல் ‘கோசா கல்வி அறநிதி’யை அமைத்து, 1.1 மில்லியன் வெள்ளி நிதி திரட்டும் பணியை முன்னெடுத்தார்.

சித்ரா, தமிழ் முரசு இதழிலிருந்து விலகியபின்னர் மூன்றாண்டுகள் (2005-2008) கொலின் என்னும் பன்னாட்டுப் பொதுத் தொடர்பு நிறுவனத்தின் வட்டார நிர்வாக இயக்குநராகவும் நிர்வாக இயக்குநராகவும் பணியாற்றினார்.

அடுத்து, மீடியாகார்ப் நிறுவனத்தின் செய்திப்பிரிவு இயக்குநராக (2008 - 2011) அதன் வானொலி, தொலைக்காட்சி, அச்சு, இணையம் ஆகிய அனைத்துத் தளங்களுக்கும் பொறுப்பு வகித்தார். பின்னர் அவற்றை ஒன்றிணைத்து, நியூஸ் ஹப் எனும் மையச் செய்திப் பிரிவை உருவாக்கினார். தொடர்ந்து, 2011 முதல் 2018 வரை மீடியாகார்ப்பில் மூத்த துணைத் தலைவராகவும், சமூகப் பிரிவின் தலைவராகவும் பணியாற்றினார். அக்காலக்கட்டத்தில் இந்திய, மலாய் பிரிவுகளின் தலைவராகத் தமிழ், மலாய் தொலைக்காட்சி, வானொலி சேவைகளுக்குப் பொறுப்பு வகித்தார். அவர் காலத்தில் தமிழ், மலாய் தொலைக்காட்சி, வானொலி நிலையங்கள் மறுசீரமைக்கப்பட்டு மின்னிலக்க உலகில் புகுந்தன.

பின்னர், 2020-இல் ரிபப்ளிக் பலதுறைத் தொழிற்கல்லூரியில் முதன்மை விரிவுரையாளராக இணைந்த அவர், 2023 முதல் அதன் நிறுவனத் தொடர்பு அலுவலக இயக்குநராகச் செயல்பட்டுவருகிறார்.

சித்ரா, சிங்கப்பூர் இந்தியர் மேம்பாட்டுச் சங்க நிர்வாகக் குழு , தேசிய ஒருங்கிணைப்பு மன்றம், தேசியச் சுற்றுப்புற அமைப்பு வாரியம், உள்ளிட்ட பல குழுக்களில் உறுப்பினராக உள்ளார்.

அவரது பங்களிப்புகளைப் பாராட்டும் வகையில், இந்திய வம்சாவளியினரின் உலக நிறுவனம் 2008-இல் உலகளாவிய இந்தியச் சாதனையாளர் என்னும் விருதையும் சிங்கப்பூர் வுமன்ஸ் வீக்லி என்னும் இதழ், 2009-இல், நம் காலத்தின் சிறந்த பெண்மணி (ஊடகம், கலைகள் பிரிவு) என்னும் பட்டத்தையும் வழங்கின. 



மேல்விவரங்களுக்கு
“Senior Management.” Republic Polytechnic. Accessed on 1 August 2025. https://www.rp.edu.sg/about-us/our-people/senior-management 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.