ஸ்ரீ கிருஷ்ணன் ஆலயம்

ஸ்ரீ கிருஷ்ணன் ஆலயம் 152 வாட்டர்லூ ஸ்ட்ரீட் என்னும் முகவரியில் அமைந்துள்ளது. அது 150 ஆண்டுகளுக்கும் மேலான வரலாற்றைக் கொண்டுள்ளதோடு அரசிதழில் ஒரு தேசிய நினைவுச் சின்னமாகவும் இடம்பெற்றுள்ளது. வணிகரான ஹனுமன் பீம் சிங், 1870-இல், வாட்டர்லூ ஸ்ட்ரீட்டில் ஓர் ஆலமரத்தின்கீழ் கிருஷ்ணருக்கு ஒரு சன்னிதியை நிறுவினார். அத்தெரு அப்போது சர்ச் ஸ்ட்ரீட் என்று அழைக்கப்பட்டது. தமிழ் இந்துச் சமூகம் அந்தத் தெருவை ‘கிருஷ்ணன் கோவில் சடக்கு’ என்று குறிப்பிட்டது. 

பக்தர்கள் அதிகரித்ததால், கூடுதல் தேவைகளுக்கு ஈடுகொடுக்கும் வகையில் கோவிலும் தொடர்ச்சியான புதுப்பிப்புகளுக்கு ஆளானது. ஆலய நிர்வாகம் ஆரம்பத்தில் பீம் சிங்கின் குடும்ப உறுப்பினர்களிடம் ஒப்படைக்கப்பட்டது. அவர்கள் கோவிலைச்சுற்றி வேலி அமைத்தல், பிரதான சன்னிதி, குவிமாடம் ஆகியவற்றை அமைத்தல் போன்ற குறிப்பிடத்தக்க முன்னேற்றங்களைச் செய்தனர். குடமுழுக்கு 1933-இல் நடைபெற்றது. சமூகத் தலைவரும், கொடையாளருமான வி. பக்கிரிசாமி பிள்ளை 1935-இல் கோவிலின் நிர்வாகத்தை ஏற்றுக்கொண்டார். பிறகு 1959-இல் மற்றொரு குடமுழுக்கு நடைபெற்றது. பிள்ளை 1984-இல் காலமானபிறகு, அவரது குடும்ப உறுப்பினர்கள் கோவிலின் நிர்வாகத்தை ஏற்றுக்கொண்டு 1989-இல் மேலும் பல மேம்பாட்டுப் பணிகளை மேற்கொண்டனர். அவற்றுள் ராஜகோபுரம் கட்டுதல், ஸ்ரீ ஆஞ்சநேயர், ஸ்ரீ விஷ்ணு துர்க்கை, ஸ்ரீ குருவாயூரப்பன் சன்னிதிகளுக்கான கருவறைகள் அமைத்தல் ஆகியவை அடங்கும்.

பல்நோக்கு மண்டபத்துடன் கூடிய ஐந்து தளக் கட்டடம் ஆலயத்துடன் 2001-இல் சேர்க்கப்பட்டது. ஆலயத்தின் வரலாற்று, பண்பாட்டுச் சிறப்புகளின் அடிப்படையில் அது 2014-ஆம் ஆண்டு தேசிய நினைவுச் சின்னமாக அங்கீகரிக்கப்பட்டது. ஏறத்தாழ நான்கு மில்லியன் வெள்ளி செலவில் நான்கு ஆண்டுகால மறுசீரமைப்புக்குப்பிறகு, 2018-இல் குடமுழுக்கு விழா நடைபெற்றது. விழாவில் அன்றைய தொடர்பு, தகவல் துறை அமைச்சர் எஸ். ஈஸ்வரன் சிறப்பு விருந்தினராகக் கலந்து கொண்டார். நாடாளுமன்ற உறுப்பினர்கள் டெனிஸ் புவா, எட்வின் தோங் ஆகியோரும் கலந்து கொண்டனர். அந்த நிகழ்வில் சுமார் 10,000 பக்தர்கள் பங்கேற்றனர். கோவில், கிருஷ்ண ஜெயந்தி கொண்டாட்டங்களுக்குப் பெயர் பெற்றது.

குவான் இம் தோங் ஹூட் சோ கோவிலுக்கு அருகாமையில் இருப்பதால், சீனப் பக்தர்கள் பலர் ஸ்ரீ கிருஷ்ணன் கோவிலில் ஊதுபத்திகளை ஏற்றி வழிபடத் தொடங்கினர். அதன் விளைவாக ஆலய நிர்வாகம் கருணைக் கடவுளான குவான் யினுக்கு ஆலய வளாகத்திற்குள்ளேயே ஒரு பீடத்தைக் கட்டியது. இரண்டு வழிபாட்டுத் தலங்களும் நல்லிணக்க நடைத் திட்டத்தில் சேர்க்கப்பட்டன. தேசிய மரபுடைமைக் கழகத்தால் 2019-இல் தொடங்கப்பட்ட அத்திட்டம், குயீன், வாட்டர்லூ, பென்கூலன் தெருக்கள் உள்ள பகுதிகளில் இலவச வழிகாட்டுச் சுற்றுப்பயணங்களை வழங்குகிறது.



மேல்விவரங்களுக்கு
Sri Krishnan Temple. Infopedia. Accessed 1 August 2025. https://www.nlb.gov.sg/main/article-detail?cmsuuid=b2a9c558-65c6-4fee-96d2-3f8cc426284c
Sri Krishnan Temple. Straits Times. Accessed 1 August 2025. https://www.orientalarchitecture.com/sid/585/singapore/singapore/sri-krishnan-temple
Sri Krishnan Temple. =Accessed 1 August 2025. https://www.ura.gov.sg/Conservation-Portal/Explore/History?bldgid=SKNTPL
Sri Krishnan Temple. Straits Times. Accessed 1 August 2025. https://str.sg/ofFj
Sri Krishnan Temple. Straits Times. Accessed 1 August 2025. https://str.sg/Jiff 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.