கவிமாலை

கவிமாலை என்னும் தமிழ் இலக்கிய அமைப்பு, சிங்கப்பூரில் கவிதை வழி தமிழ் வளர்ப்பதையும் தமிழ்க் கவிஞர்களை உருவாக்குவதையும் நோக்கமாகக் கொண்டு, 2000-ஆம் ஆண்டில் கவிஞர் கண்ணதாசன் பிறந்த நாளாகிய 24 ஜூன் அன்று, பிச்சினிக்காடு இளங்கோவால் தொடங்கப்பட்டது. பிறகு கவிதைக்காகக் கவிஞர்களே நடத்தும் அமைப்பாக மாறியது. இவ்வமைப்பு கவிதை ஆர்வமுடையவர்களை ஒன்றிணைக்கும் விதமாக மாதாந்திரச் சந்திப்பு நிகழ்ச்சிகளை நடத்திவருகிறது. மரபுக்கவிதை, நவீன கவிதை உட்பட அனைத்துக் கவிதை வடிவங்களுக்கும் இடமளிக்கிறது. பரிசு பெறும் சிறப்புக் கவிதைகள் தொகுக்கப்பட்டு ஆண்டிறுதியில் ஒரு நூலாக வெளியிடப்படுகிறது. வளர்தமிழ் இயக்கமும், தேசிய நூலக வாரியமும் நடத்திவரும் முக்கிய தமிழ்மொழி சார்ந்த திட்டங்களில் பங்களிக்கிறது.

கவிமாலையின் பல தமிழ் வெளியீடுகள் ஆங்கில மொழிபெயர்ப்புடன் வெளிவந்துள்ளன. தங்கமுனை விருதுபெற்ற சீன, மலாய், ஆங்கிலக் கவிதைகள் ‘சென்றிடுவீர் எட்டுத்திக்கும்’ என்ற தொடராகத் தமிழில் மொழிபெயர்க்கப்பட்டு ஒலிப்பதிவுடன் காணொளிகளாக வெளியிடப்பட்டன. அன்றாடம் ஒரு தமிழ்க் கவிதையை, 2019 முதல், சமூக ஊடகக் குழுக்களில் பகிர்ந்துவருவது முக்கியமான மற்றொரு பங்களிப்பு.இளையரைக் கவிதையின்பால் ஈர்க்கும் முயற்சியாக 2019-இல் ‘விதைகள்’ என்னும் மாணவரணி தொடங்கப்பட்டது. தொழில்நுட்ப உதவியுடன் மாணவர்களுக்காக மாணவர்களே வடிவமைக்கும் நிகழ்ச்சிகள் நடந்துவருகின்றன. இதில் நூற்றுக்கணக்கான மாணவர்கள் பங்கேற்றுள்ளனர். மேலும், தொடக்கப் பள்ளி, உயர்நிலைப் பள்ளி, தொழில்நுட்பக் கல்லூரி, பல்கலைக்கழகங்களில் பயிலும் மாணவர்களுக்காகக் கவிதைப் பயிலரங்குடன் கவிதை, மொழிபெயர்ப்புப் போட்டிகளும் நடத்தப்படுகின்றன.

சிங்கப்பூர்த் தமிழ் இலக்கியத்திற்குப் பணியாற்றிய சான்றோருக்கு இலக்கியக் கணையாழி விருது, சிங்கப்பூரில் வெளியிடப்படும் சிறந்த கவிதைப் புத்தகத்துக்கு ஆண்டுதோறும் தங்கப்பதக்கம், மாதாந்திரப் போட்டிகளில் பங்கேற்கும் சிறந்த இளங்கவிஞருக்கு தங்கமுத்திரை உள்ளிட்ட விருதுகளை கவிமாலை வழங்கிவருகிறது.



மேல் விவரங்களுக்கு
Kavimaalai. (n.d.). Accessed 1 August 2025. www.kavimaalai.com 

To read in English 

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.