கார்த்திகேயன், கே

கே. கார்த்திகேயன் (பி. 1960) சிங்கப்பூரின் 12-ஆவது நாடாளுமன்றத்தில் 2014 முதல் 2016 வரை நாடாளுமன்ற நியமன உறுப்பினராகப் பணியாற்றினார். தொழிலாளர் இயக்கத்தில் அவரது விரிவான அனுபவம், பங்களிப்பு காரணமாக அவர் தொழிலாளர் இயக்கத்தால் நாடாளுமன்றத்திற்குப் பரிந்துரைக்கப்பட்டார்.

நாடாளுமன்றத்தில் அவர் குறைந்த சம்பளத் தொழிலாளர்களுக்கு நியாயமான ஊதியம், அதிகரிக்கும் மருத்துவச் செலவுகள், நல்ல வேலைகளுக்கான வாய்ப்புகளைப் பெருக்குதல் முதலிய பிரச்சினைகள் குறித்துப் பேசினார்.

கார்த்திகேயன் லா ட்ரோப் பல்கலைக்கழகத்தில் மனிதவளத் துறையில் இளநிலைப் பட்டமும் மோனாஷ் பல்கலைக்கழகத்தில் பொதுக்கொள்கை, மேலாண்மைத் துறையில் முதுநிலைப் பட்டமும் பெற்றுள்ளார்.

அவர் 30 ஆண்டுகளுக்கும் மேலாகப் பெட்ரோலியம், பெட்ரோ-கெமிக்கல் துறைகளில் பணியாற்றி வருகிறார். அவரது தொழில் வாழ்க்கைக்கு அப்பால், தொழிற்சங்க இயக்கத்தில் தீவிரமாகச் செயல்பட்டு, பல தலைமைப் பதவிகளை வகித்துள்ளார். அவர் பெட்ரோலியத் தொழில்துறை ஐக்கிய ஊழியர் சங்கத்திற்குப் பொதுச் செயலாளராக இருந்தார். தேசியத் தொழிற்சங்கக் காங்கிரஸ் (தே.தொ.கா.) மத்தியக் குழுவின் துணைத் தலைவராகத் தேர்ந்தெடுக்கப்பட்டார். தே.தொ.கா. பணியிடப் பாதுகாப்பு, சுகாதாரக் குழுவின் தலைவராகவும் சிங்கப்பூரின் பணியிடப் பாதுகாப்பு மன்றத்தில் உறுப்பினராகவும் இருந்தார். தே.தொ.கா. ரசாயனத்தொழில் பிரிவின் துறையின் தலைவராக இருந்தார். அவர் தற்போது பெட்ரோலியத் தொழில் ஐக்கிய ஊழியர் சங்கத்தின் ஓய்வுபெற்ற கௌரவப் (Emeritus) பொதுச் செயலாளராக உள்ளார்.

மேலும், அவர் ஊழியரணி மேம்பாட்டு வாரியம், பொதுப் போக்குவரத்து மன்றம்,  மனிதவள நிபுணத்துவ நிறுவனம் என முக்கியப் பொது நிறுவனங்களில் உறுப்பினராகவும் இருந்தார். 

தமிழ்ச் சமூகத்தைப் பொறுத்தவரை, சிங்கப்பூர் தமிழ்ச் சங்கத்தின் தலைவராகப் பணியாற்றுகிறார். லிட்டில் இந்தியா கடைக்காரர்கள், மரபுடைமைச் சங்கத்தின் உறுப்பினராகவும் உள்ளார்.

தொழிலாளர் இயக்கத்திற்கான கார்த்திகேயனின் அர்ப்பணிப்பு அவருக்கு அரசாங்கத்தின் பொதுப் பணிப் பதக்கம், பொதுப் பணிச் சிறப்புப் பதக்கம் உள்ளிட்ட விருதுகளைப் பெற்றுத் தந்துள்ளது. மேலும் தே.தொ.கா. வழங்கும் உயரிய விருதான தே.தொ.கா. மே தின நட்சத்திரம் (பதக்கப்பட்டை) விருதையும் அவர் பெற்றுள்ளார்.



மேல்விவரங்களுக்கு
National Trades Union Congress. “Labour Movement proposes veteran union leader K Karthikeyan for Nominated Member of Parliament.” 5 May 2014. https://www.ntuc.org.sg/uportal/news/Labour-Movement-proposes-veteran-union-leader-K-Karthikeyan-for-Nominated-Member-of-Parliament/.
Wong, Julian. “What, Exactly, Does A Union Leader Do??” Rice Media, 27 September 2017. https://www.ricemedia.co/what-does-a-union-leader-do/. 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.