நாடாளுமன்ற நியமன உறுப்பினர்

சிங்கப்பூரில் நாடாளுமன்ற உறுப்பினர்கள், தேர்ந்தெடுக்கப்பட்ட உறுப்பினர், தொகுதியில்லா உறுப்பினர், நியமன உறுப்பினர் என மூவகைப்படுவர். அவர்களுள் நியமன உறுப்பினர், அரசியல் கட்சியையோ தேர்தல் தொகுதியையோ பிரதிநிதிப்பவர் அல்லர். நாடாளுமன்றத்தில் அவர் முன்வைக்கும் கருத்துகள் அவரது தன்னிச்சையான கருத்துகளாகும். நாடாளுமன்ற நியமன உறுப்பினர் திட்டம், தமிழர்கள் நாடாளுமன்ற விவகாரங்களில் ஆக்கப்பூர்வமாகச் செயற்படவும் தேர்தல்களில் போட்டியிடாமலே தக்க பங்களிக்கவும் வாய்ப்பளித்துள்ளது.

நாடாளுமன்ற நாயகர் தலைமையில் அமைக்கப்படும் ஒரு சிறப்புப் பொறுக்குக் குழுவின் பரிந்துரையின் அடிப்படையில் நியமன உறுப்பினர் அதிபரால் நியமிக்கப்படுகிறார். ஒரு நியமனத்தின் கால அளவு இரண்டரை ஆண்டு. பொறுக்குக் குழு, சிறந்த முறையில் மக்களுக்குச் சேவைசெய்தவர்களையோ சிங்கப்பூருக்குப் பெருமை சேர்த்தவர்களையோ பரிந்துரைக்கலாம். கலை, பண்பாடு, அறிவியல், வணிகம், வர்த்தகம், தொழில், சமூகச் சேவை, தொழிலாளர் இயக்கம் ஆகிய துறைகளைச் சார்ந்த குழுக்களும் தக்கவர்களை பொறுக்குக் குழுவிடம் முன்மொழியலாம்.

பல்வேறு சமூகங்களின் கருத்துகள் நாடாளுமன்றத்தில் பரந்த அளவில் பிரதிநிதிக்கப்படுவதை உறுதி செய்வதற்காக, ஒன்பது உறுப்பினர்கள் வரை நியமனம் செய்ய 1990-இல் அரசமைப்பில் வகைசெய்யப்பட்டது. அரசமைப்புத் திருத்தங்கள், பொது நிதி தொடர்பான தீர்மானங்கள், அரசாங்கத்தின் மீதான நம்பிக்கையில்லாத் தீர்மானங்கள், அதிபரைப் பதவிநீக்கும் தீர்மானம் ஆகியவை தவிரப் பிற விவாதங்களில் நியமன உறுப்பினர்கள் பங்கேற்கலாம், வாக்களிக்கலாம்.

நியமன உறுப்பினர் திட்டம் 1970-களிலிருந்து 1990-கள் வரையிலான காலக்கட்டத்தில் உருப்பெற்றது. ஆளுங்கட்சியான மக்கள் செயல் கட்சி ஏறக்குறைய அனைத்து இடங்களையும் தொடர்ந்து வென்றுவந்த சூழலில், நாடாளுமன்றத்தில் காத்திரமான விவாதத்தை ஊக்குவிக்கவும் பரந்துபட்ட சமூகக் கருத்துகளைப் பிரதிபலிக்கவும் பல வழிமுறைகள் பரிசீலிக்கப்பட்டன. அவற்றுள் ஒன்றுதான் 1990-இல் அறிமுகப்படுத்தப்பட்ட நாடாளுமன்ற நியமன உறுப்பினர் திட்டம். தொடக்கத்தில், ஒவ்வொரு தேர்தலுக்குப் பிறகும், உறுப்பினர்களை நியமிக்க வேண்டுமா வேண்டாமா என்பதை ஆறு மாதங்களுக்குள் நாடாளுமன்றம் முடிவுசெய்ய வேண்டியிருந்தது. பிறகு, 2010-இல், நியமன உறுப்பினர்கள் நாடாளுமன்றத்தில் நிரந்தரமாக இடம் பெற்றிருக்கும் வகையில் மாற்றம் செய்யப்பட்டது. நியமன உறுப்பினர் திட்டத்தால் நாடாளுமன்ற விவாதத்தின் தரம் மேம்பட்டதன் அடிப்படையில் அம்மாற்றம் செய்யப்பட்டதாக அப்போதையப் பிரதமர் லீ சியன் லூங் குறிப்பிட்டார்.

இதுவரை நாடாளுமன்ற நியமன உறுப்பினர்களாகப் பணியாற்றிய தமிழர் ஒவ்வொருவரையும் குறித்த சுருக்கமான பதிவுகள் கீழே:
அரசு துரைசாமி
தினகரன், ரா
கணேஷ் ராஜாராம்
கார்த்திகேயன், கே
மாதேவ் மோஹன்
முகமது இர்ஷாத்
நித்தியானந்தன், ஆ
ராஜ் ஜோஷ்வா தாமஸ்
ரஸ்வானா பேகம்
தனலெட்சுமி, கே



மேல்விவரங்களுக்கு
“Nominated Member of Parliament.” Wikipedia. Accessed 1 August 2025. https://en.wikipedia.org/wiki/Nominated_Member_of_Parliament.
“Members of Parliament.” Parliament of Singapore. Accessed 1 August 2025. https://www.parliament.gov.sg/about-us/structure/members-of-parliament.
Benjamin Ho and John Choo. “Nominated Member of Parliament (NMP).” BiblioAsia 20, no. 4 (Jan–Mar 2025). https://biblioasia.nlb.gov.sg/vol-20/issue-4/jan-mar-2025/nominated-member-of-parliament-nmp/.

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.