சிங்கைத் தமிழ்ச் சங்கம்

சிங்கைத் தமிழ்ச் சங்கம், சிங்கப்பூரின் பழமையான தமிழ்ச் சங்கங்களில் ஒன்றாகும். முதலில், தமிழர் சீர்திருத்தச் சங்கம் என்னும் பெயரில் 23 ஜூன் 1932 அன்று நிறுவப்பட்ட இச்சங்கம், 2001-இல் சிங்கைத் தமிழ்ச் சங்கம் எனப் பெயர்மாற்றம் கண்டது. பெயர்மாற்றத்தோடு, அமைப்பின் நோக்கங்களும் நடவடிக்கைகளும் மாறின. தமிழர் சீர்திருத்தச் சங்கம், அன்றைய சமூகத் தலைவர் கோ. சாரங்கபாணியாலும் அவரைப்போன்றே சீர்திருத்த எண்ணம் கொண்ட மற்ற சில தமிழர்களாலும் தோற்றுவிக்கப்பட்டது. தமிழ்ச் சமூகம் கல்வியிலும் பொருளாதாரத்திலும் மேம்பட வேண்டும், சமூகத்தில் சீர்திருத்த எண்ணங்கள் வளர்க்கப்படவேண்டும் என்பன அச்சங்கத்தின் நோக்கங்களாக இருந்தன. தற்போது, இச்சங்கம், தமிழ் மொழி, பண்பாடு சார்ந்த நடவடிக்கைகளை அதிகம் மேற்கொள்வதோடு, அவற்றைக் குறிப்பாகத் தமிழ் இளையரிடையே ஊக்குவிப்பதில் கவனம் செலுத்துகிறது. மேலும், எளிதில் பாதிக்கப்படக்கூடிய சமூகங்களுக்கெனச் சில சிறப்புத் திட்டங்களையும் உருவாக்கியுள்ளது. ஆண்டுதோறும் நடைபெறும் தமிழ் மொழி விழா, தமிழ் இளையர் விழா ஆகியவற்றில் பங்கேற்பதோடு, தமிழ் மொழி, பண்பாடு சார்ந்த நிகழ்வுகளை ஏற்பாடு செய்வதில் வளர்தமிழ் இயக்கத்தின் நீண்டகாலப் பங்காளியாகவும் இருந்துவருகிறது. 

சங்கம், 2019-இல் சிகரம் அகராதி என்னும் தமிழ் மின்னிலக்க அகராதியை வெளியிட்டது குறிப்பிடத்தக்கது. மேலும், 2023-இல், சொற்கனல் என்னும் பெயரில், பல்கலைக்கழக மாணவர்களுக்கான சொற்போர் நிகழ்ச்சியைத் தொடங்கினர். அம்மாணவர்களிடையே தமிழார்வத்தைத் தூண்டி, பள்ளிகளுக்கிடையிலான சொற்போர்களைக் காட்டிலும் உயர்தர விவாதங்கள் நடைபெற வழிவகுப்பது ஆண்டுதோறும் நடைபெறும் அந்நிகழ்ச்சியின் நோக்கம். 

மேல் விவரங்களுக்கு
Tamilnation.org. (n.d.). One Hundred Tamils of the 20th Century. Accessed 1 August 2025. https://tamilnation.org/hundredtamils/sarangapany.htm
Singapore Tamil Society. (n.d.). Accessed 1 August 2025. https://tamilsociety.sg/  

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.