சிங்கப்பூர் இந்தியக் கலைஞர் சங்கம்

சிங்கப்பூர் இந்தியக் கலைஞர் சங்கம் 1971-இல் பதிவுசெய்யப்பட்டது. நாடக ஆசிரியர் ச. வரதன், நடிகர் ராம் நாராயணசாமி ஆகியோர் இணைந்து நிறுவிய சங்கம், நாடகம், இசை, நடனம் உள்ளிட்ட பல கலைத்துறைகளைச் சேர்ந்த இந்தியக் கலைஞர்களை ஓர் அமைப்பின்கீழ் ஒன்றிணைக்க முயன்றது. மேலும், தம் கலை ஆக்கங்கள், விருதளிப்புகள்மூலம் மக்களைச் சென்றடைந்து, இந்தியச் சமூகத்தின் கலை, பண்பாடு, சமூகநிலை ஆகியவற்றில் மேம்பாடு காணவும் விரும்பியது.

இருப்பினும், சங்கத் தலைவர்களின் திறனும் தொடர்பும் தமிழ் நாடகத்துறையிலேயே இருந்ததால், அனைத்து இந்தியக் கலைஞர்களுக்கும் நிகழ்கலைகளுக்குமான சங்கமாக அல்லாமல் தமிழ் நாடக ஊக்குவிப்புச் சங்கமாகவே பெரிதும் வளர்ந்தது. சங்கம், 1970-கள், 1980-களில், தமிழ் நாடகங்களைத் தொடர்ந்து நடத்தியதோடு, வரதனின் தலைமையில், இயன்றவரை சமூகத்தை ஈர்க்கும் வகையில் புதிய கலைக்கூறுகளையும் கருப்பொருள்களையும் சேர்த்தது. நாடக மேடையைத் தாண்டிச் சங்கம் பண்பாட்டு, நிதிதிரட்டு இசை நிகழ்ச்சிகளையும் ஏற்பாடுசெய்து, சமூகத்திற்கு மேலும் தொண்டாற்றியது.

சங்கத்தின் முக்கியமான ஒரு முயற்சி தொடர்ந்து கலைத்திறனை அங்கீகரித்துக் கலைஞர்களை ஊக்குவித்தது. சிங்கப்பூரில் சிறந்து விளங்கும் இந்தியக் கலைஞர்களைக் கௌரவிக்கும் வகையில் 1990-கள் முதல் சங்கம் விருதளிப்பு விழாக்களை நடத்தியது. மேலும், சங்கம் கலை வரலாற்று ஆவணப்படுத்தலையும் ஆதரித்தது. கலாசாரப் பதக்கம் பெற்ற வரதன், சிங்கப்பூர்த் தமிழ் நாடக வளர்ச்சியையும் ஆளுமைகளையும் குறித்த முக்கியமான பதிவுகளைத் தொகுத்து இரண்டு நூல்கள் எழுதியுள்ளார். அவற்றைச் சங்கம் வெளியிட்டது. சங்கத்தின் படைப்புகள் சிங்கப்பூரின் எல்லைகளுக்கு அப்பாலும் பரவியது. சென்னையில், 2009-இல், சோழர் குறித்த வரலாற்று நாடகம் ஒன்றை தேசியக் கலை மன்றத்தின் ஆதரவுடன் படைத்தது. கலை மன்றம் பல்லாண்டுகளாகச் சங்கத்தின் பல தயாரிப்புகளுக்கு நிதியாதரவு அளித்துவந்துள்ளது. சிங்கப்பூர் இந்தியக் கலைஞர் சங்கம், 2022-இல், அதன் உறுப்பினர்கள் சிலர்மீது நீதிமன்றத்தில் வழக்குத் தொடர்ந்தது. சங்கத்தின் வலைத்தளம் இணையத்திலிருந்து நீக்கப்பட்டுவிட்ட நிலையில், அதன் தற்போதைய நிலை தெரியவில்லை.



மேல்விவரங்களுக்கு
“S. Varathan.” Esplanade Offstage, 12 October 2016. https://www.esplanade.com/offstage/arts/s-varathan
"S. Varathan.” Singapore Infopedia. Accessed on 1 August 2025. https://www.nlb.gov.sg/main/article-detail?cmsuuid=e714a7ac-9278-4170-896e-f54e790b7eea
“Singapore Indian Artistes’ Association.” Centre 42. Accessed on 1 August 2025. https://www.centre42.sg/archive/organisations/887/singapore-indian-artistes-association/
“Newspaper clippings, drama reviews and flyers…” Singapore Indian Artistes’ Association, 3 October 1972. https://www.nas.gov.sg/archivesonline/private_records/record-details/de0d6ebc-115b-11e3-83d5-0050568939ad
Annual Report 2008/2009: Arts on the Rise. Singapore: National Arts Council, 2009. https://www.nac.gov.sg/docs/default-source/about-us-files/annual-report/fy0809---arts-on-the-rise.pdf
Gunasegarn s/o Sinniah v Singapore Indhia Kalaingyar Sangam (Singapore Indian Artistes’ Association). Singapore High Court, Originating Summons No. 1114 of 2021. Judgment reserved February 28, 2022. Accessed on 1 August 2025. https://www.elitigation.sg/gd/s/2022_SGHC_42#:~:text=1%20The%20defendant%20is%20a,%E2%80%9Cthe%20Constitution%E2%80%9D

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.