எம்.கே. குமார்

எம்.கே. குமார் (பி. 1977) சிங்கப்பூர் இலக்கியப் பரிசு பெற்ற எழுத்தாளர். பெரிதும் கவிதை, புனைவு ஆகிய இலக்கிய வடிவங்களில் எழுதியுள்ளார். 

குமார் இந்தியாவின் தீயத்தூரில் பிறந்தார். சென்னையில் வேதியியல் தொழில்நுட்பக் கல்லூரியில் பட்டயப்படிப்பை 1995-இல் முடித்தார். இந்தியாவில் ஆறாண்டு ஒரு தனியார் நிறுவனத்தில் பணியாற்றியபின், 2001-இல் சிங்கப்பூருக்குக் குடிபெயர்ந்தார். பிறகு, 2010-இல் ஆஸ்திரேலியா நியூகாசல் பல்கலைக்கழகத்தில் இயற்கைப் பாதுகாப்பு, சுற்றுச்சூழியலில் பட்டம் பெற்றார். குமார், சுற்றுப்புறத் துறையில் மேலாளராகவும் கட்டுமானப் பாதுகாப்புத்துறைப் பயிற்றுவிப்பாளராகவும் தணிக்கையாளராகவும் பணிபுரிகிறார். 

சிறுவயதிலிருந்தே இலக்கிய ஆர்வமுள்ள குமார், உயர்நிலைப் பள்ளியில் படிக்கும்போது கையெழுத்துப் பத்திரிகை ஒன்றை நடத்தியுள்ளார். அவரது முதல் சிறுகதை 2003-இல் திண்ணை இணைய இதழில் வெளியானது. காலச்சுவடு, தி சிராங்கூன் டைம்ஸ், வல்லினம் உள்ளிட்ட இணைய, அச்சிதழ்களில் அவரது படைப்புகள் வெளிவந்துள்ளன. மருதம் (2006), 5:12 P.M. (2017), ஓந்தி (2019) உள்ளிட்ட சிறுகதைத் தொகுப்புகளையும் சூரியன் ஒளிந்தணையும் பெண் (2013) உள்ளிட்ட கவிதைத் தொகுப்புகளையும் வெளியிட்டுள்ளார். நதிமிசை நகரும் கூழாங்கற்கள் (2015) என்னும் தலைப்பில் சிங்கப்பூர்ப் பெண் கவிஞர்களின் கவிதைகளைத் தொகுத்து வெளியிட்டுள்ளார். 

கண்களுக்கு அப்பால் இதயத்துக்கு அருகில் (2015) என்னும் சாகித்திய அகாதெமி வெளியிட்ட உலகச் சிறுகதைகள் தொகுப்பில் எம்.கே. குமாரின் 5:12 P.M. சிறுகதை இடம்பெற்றுள்ளது. சிங்கப்பூர்த் தமிழ் எழுத்தாளர் கழகத்தின் கண்ணதாசன் விருது (2017) உள்ளிட்ட பல்வேறு விருதுகளைப் பெற்ற அவர், சிங்கப்பூர் இலக்கியப் பரிசை 2018-இல் பெற்றார்.



மேல்விவரங்களுக்கு
“எம்.கே.குமார்.” Tamil Wiki. Accessed on 1 August 2025. https://tamil.wiki/wiki/எம்.கே.குமார்
சிவானந்தம் நீலகண்டன். “கண்களுக்கு அப்பால் இதயத்துக்கு அருகில்,” 22 October 2017. https://sivananthamneela.wordpress.com/2017/10/22/கண்களுக்கு-அப்பால்-இதயத்/ 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.