சிங்கப்பூர் இந்திய நாடக மற்றும் திரைப்பட ஆய்வாளர்கள்

திரைப்படத் தயாரிப்பாளர், நாடகவாதி, எழுத்தாளர், ஊடக-கலை கல்வியாளர் சலீம் ஹாடி, நடனக் கலைஞர், பாடகி, நடிகை, ஆசிரியர் த. பிரியதரிசினி ஆகிய இருவரும் ஒன்றிணைந்து, திரைப்பட ஆர்வலர்களுக்கு வலுச் சேர்க்கும் தொலைநோக்குப் பார்வையுடன்சிங்கப்பூர் இந்திய நாடக மற்றும் திரைப்பட ஆய்வாளர்கள் (சி.இ.நா.தி.ஆ.) அமைப்பை நிறுவினர். முதலில், 2016-ஆம் ஆண்டு ஒரு சமூகத் தொழிலமைப்பாக நிறுவப்பட்ட சி.இ.நா.தி.ஆ. பின்னர் 2018-இல் ஒரு லாப நோக்கற்ற அமைப்பாகப் பதிவு செய்யப்பட்டது. அடையாளம், பண்பாடு, சமூகம் ஆகியவைபற்றிச் சமூகத்தில் தாக்கத்தை ஏற்படுத்தும் கதைகளைச் சொல்வதே அமைப்பின் முதல் நோக்கம். நாடகத்தையும் திரைப்படத்தையும் இணைக்கும் கலப்புத் தயாரிப்புகளை உருவாக்குவதோடு, பட்டறைகள், உரையாடல்கள், கலந்துறவாடல்கள், திரையிடல்கள் முதலியவற்றையும் நடத்துகிறது. மேலும், திரைப்பட, நாடகத் தயாரிப்பில் ஆர்வமுள்ளோருக்குப் பயிற்சி தருவதோடு, அவர்களின் திறமைகளை வெளிக்காட்டுதல், அவர்களைப்பற்றிய ஆவணங்களைத் தயாரித்தல் முதலியவற்றிலும் உதவுகிறது. தொடர்ந்து வாழ்நாள் முழுவதும் கற்பதற்கும் வழிசெய்கிறது.

சி.இ.நா.தி.ஆ. பல படைப்புகளை உருவாக்கியுள்ளது. அவற்றுள் ‘துயில்’ என்னும் நாடகமும் ‘நச்சுக்கோப்பை’ என்னும் திரைப்படமும் அசாதாரணக் கருப்பொருள்களுக்காகப் பெயர்பெற்றவை. துயில், சிங்கப்பூரில் மக்கள் எதிர்கொள்ளும் தூக்கம் தொடர்பான பிரச்சினைகள் குறித்த இருமொழி நாடகத் தயாரிப்பு. நச்சுக்கோப்பை, கலாசாரப் பதக்கம் வென்ற பி. கிருஷ்ணன், 1967-இல் வானொலியில் படைத்த வரலாற்று நாடகத்தை அடிப்படையாகக் கொண்ட ஒரு நாடகத் திரைப்படம். அதன் கதை 15-ஆம் நூற்றாண்டு மலாக்காவின் பின்னணியில் புனையப்பட்டது. சிங்கப்பூர் இந்திய நாடக மற்றும் திரைப்பட ஆய்வாளர்கள் அமைப்பின் குறிப்பிடத்தக்க இன்னொரு முயற்சி, சிங்கப்பூரில் தயாரிக்கப்பட்ட குறும்படங்களின் ஒரே இந்திய குறும்படக் காப்பகத்தை உருவாக்கியது. சிங்கப்பூரின் புகழ்பெற்ற திரைப்படத் தயாரிப்பாளர் கே. ராஜகோபால் 2018-ஆம் ஆண்டு தொடக்கிவைத்த THEINDBOX.SG வலைத்தளம், தமிழ், மலையாளம், பஞ்சாபி, இந்தி, தெலுங்கு உள்ளிட்ட எந்த இந்திய மொழியிலும் சிங்கப்பூரில் தயாரிக்கப்பட்ட அனைத்துப் படங்களையும் சேகரிக்கும் வகையில் வடிவமைக்கப்பட்டுள்ளது. நீடித்துச் செயல்படவிருக்கும் அந்தக் காப்பகத் திட்டம், சிங்கப்பூரில் உள்ள இந்தியர்களின் அடையாளங்களையும் குரல்களையும் எதிர்காலச் சந்ததியினருக்காகப் பாதுகாக்கும் என்று நம்பப்படுகிறது.



மேல்விவரங்களுக்கு
Singapore Indian Theatre & Film Explorers. Accessed 1 August 2025. https://linktr.ee/sitfe

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.