தமிழ்மொழி பண்பாட்டுக் கழகம்

தமிழ்மொழி பண்பாட்டுக் கழகம் 2 ஆகஸ்ட் 1980 அன்று அன்றையத் துணைப் பிரதமர் கோ கெங் சுவீயால் தொடங்கி வைக்கப்பட்டது. தமிழ்மொழி பண்பாட்டுக் கழகத்தை அமைப்பதற்கான யோசனை அதன் முதல் அறங்காவலர் குழுத் தலைவரான சி. வி. தேவன் நாயரின் சிந்தையில் உதித்த ஒன்று. அப்போது தேசியத் தொழிற்சங்கக் காங்கிரசின் தலைவராக இருந்த அவர் பின்னர் சிங்கப்பூர்க் குடியரசின் அதிபரானார். சிங்கப்பூர் மலையாளியான அவர், தமிழ்மொழி பண்பாட்டுக் கழகம் ”குடியரசில் தமிழ் மொழி கற்பதை, பயன்படுத்தப்படுவதை வளர்ப்பதற்கும் இந்தியப் பண்பாடு, விழுமியங்களைப் பேணிக் காப்பதற்குமான” ஓர் அனைத்திந்தியர் அமைப்பாக நிறுவப்பட வேண்டும் என்று வலியுறுத்தினார். அதற்கேற்ற வகையில் அவர் மற்றொரு புகழ்பெற்ற தமிழரல்லாத நீதிபதியான சூர் சிங் சித்துவை குழு உறுப்பினராக நியமித்தார். முன்னணிக் கல்வியாளரான பேராயர் டி.ஆர்.  துரைசாமி, முன்னணி வர்த்தகரான டி.ஏ. அமீனூல்லா ஆகியோரும் இக்குழுவில் அப்போது இடம் பெற்றிருந்தனர். நாயர், கழகத்தின் நிர்வாகக் குழுவின் முதல் தலைவராகப் பொறுப்பு வகித்தார். 

கழகத்தின் தலைவராகச் சிறிது காலம் பணியாற்றிய நாயர் விலகியபின், கழகம் ஓர் அனைத்திந்தியர் அமைப்பாகவும், தமிழ், தென்னிந்திய சிங்கப்பூரர் அனைவருக்கும் ஒரு பொது மொழியாகவும் விளங்க வேண்டும் என்ற அவரின் லட்சியம் மெய்ப்படவில்லை. இருப்பினும், இந்த அமைப்பு தமிழ் மொழியையும் பண்பாட்டையும் கலைகளையும் வளர்ப்பதிலும் பேணிக்காப்பதிலும் தமிழ்ச் சமூகத்துக்குத் தொடர்ந்து சேவையாற்றி வருகிறது. கழகத்தின் முதன்மையான நிகழ்வுகளாகத் திருக்குறள் விழா, பாரதியார் விழா, ஒளவையார் விழா ஆகியவை ஆண்டுதோறும் நடத்தப்படுகின்றன. மேலும், திருவள்ளுவர், பாரதி, ஒளவை ஆகியோரின் பெயரில் விருதுகளையும் கழகம் வழங்குகிறது. தமிழ்மொழி பண்பாட்டுக் கழகம், திருக்குறள்  விழாவைத் தொய்வின்றித் தொடர்ந்து கொண்டாடும்  அதன் சாதனைக்காக சிங்கப்பூர்ச் சாதனைப் புத்தகத்தினால் அங்கீகரிக்கப்பட்டுள்ளது. கழகம் தமிழ் மணி என்னும் சஞ்சிகையை வெளியிடுகிறது. மேலும், தமிழ் மொழியைச் சரளமாகப் பேசுவதை ஊக்குவிக்க ஒரு பேச்சாளர் மன்றத்தை டோஸ்ட்மாஸ்டர் இண்டர்நேஷனல் என்னும் அமைப்போடு சேர்ந்து உருவாக்கியுள்ளது.



மேல்விவரங்களுக்கு
Tamil Language & Cultural Society. (n.d.). Accessed 1 August 2025. www.tamilmozhi.org

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.