ஆவடை தனலட்சுமி

தனம் என்று பரவலாக அறியப்பட்ட ஆவடை தனலட்சுமி (1925 - 2005) சிங்கப்பூர் நாடாளுமன்ற உறுப்பினரான முதல் இந்தியப் பெண். மேலும், சிங்கப்பூரின் 'முதல் பெண்மணி' என்ற அந்தஸ்தைப் பெற்ற முதல் இந்தியப் பெண்மணி. சிங்கப்பூரில் பிறந்த, நான்காம் தலைமுறைச் சிங்கப்பூரரான தனம், இராமகிருஷ்ணா மிஷன் பள்ளியில் படித்தார். அவர் 1953-இல் சி.வி. தேவன் நாயரை மணந்தார். நாயர் 1956-இல் கம்யூனிஸ்ட் ஆதரவுக் குற்றச்சாட்டில் சிறைக்கு அனுப்பப்பட்டார். பின்னர் 1959-இல் மக்கள் செயல் கட்சி (ம.செ.க.) தேர்தலில் வெற்றி பெற்றபோது விடுவிக்கப்பட்டார். அந்த மூன்று ஆண்டுகளில், தனம் தம் பகுதிநேரத் தையல் வேலை வருமானம், நாயர் தொழிற்சங்கத் தலைவராக இருந்த சிங்கப்பூர் டிராக்‌ஷன் கம்பெனி மாதந்தோறும் வழங்கிய 300 வெள்ளி ஆகியவற்றைக்கொண்டு குடும்பத்தை நிர்வகித்தார்.

நாயர் மலேசியாவில் இருந்தபோது நடந்த 1963 பொதுத் தேர்தலில், தனம் ம.செ.க. வேட்பாளராக மோல்மீன் தொகுதியில் போட்டியிட்டுச் சட்டமன்ற உறுப்பினரானார். சிங்கப்பூர்ச் சட்டமன்றம் 1965-இல் நாடாளுமன்றமாக மாறியபோது, முதல் இந்தியப் பெண் நாடாளுமன்ற உறுப்பினர் என்ற பெருமையையும் பெற்றார். அவர் 1968 வரை முழுத் தவணைக் காலமும் பதவியில் இருந்தார். அந்த ஐந்து ஆண்டுகளில், அவர் விவாதங்களில் தீவிரமாகப் பங்கேற்று, மாதர் பிரச்சினைகள் குறித்தும் வசதி குறைந்தோர் நிலை குறித்தும் பேசினார். கருக்கலைப்பு, குடியுரிமை, தேசியச் சேவை, மருத்துவமனை நிலவரங்கள், தமிழ் மொழி உள்ளிட்ட பல்வேறு பிரச்சினைகள் குறித்துக் கேள்விகளை எழுப்பினார். விவாதங்களின்போது அவர் பலமுறை தமிழில் பேசினார்.

நாயர், 1981-இல் சிங்கப்பூரின் மூன்றாவது அதிபராகப் பதவியேற்றபோது, தனம் சிங்கப்பூரின் ‘முதல் பெண்மணி’ ஆனார். நாயர் குடிப்பழக்கத்திற்குச் சிகிச்சை பெறுவதற்காகப் பதவி விலகுவதாகப் பிரதமர் லீ குவான் யூ நாடாளுமன்றத்தில் அறிவித்ததை அடுத்து, 1985-ஆம் ஆண்டு தேவன் நாயர் அதிபர் பதவியைத் துறந்தார். குற்றச்சாட்டுகளை மறுத்த அவர், பின்னர் கனடாவுக்குக் குடிபெயர்ந்தார். தனமும் அவருடன் குடிபெயர்ந்து இருபதாண்டுகளுக்குப்பின் அங்கேயே காலமானார். 



மேல்விவரங்களுக்கு
“Life with Devan Through Thick and Thin,” New Nation, 25 October 1981, 10. https://eresources.nlb.gov.sg/newspapers/digitised/article/newnation19811025-1.2.28
Parliament of Singapore, Obituary Speeches, vol. 24 of Parliamentary Debates: Official Report, 17 December 1965, cols 285
Parliament of Singapore, Obituary Speeches, vol. 23 of Parliamentary Debates: Official Report, 16 November 1964, cols 512
Parliament of Singapore, Obituary Speeches, vol. 24 of Parliamentary Debates: Official Report, 17 December 1965, cols 272
Parliament of Singapore, Obituary Speeches, vol. 25 of Parliamentary Debates: Official Report, 19 December 1966, cols 888
Parliament of Singapore, Obituary Speeches, vol. 25 of Parliamentary Debates: Official Report, 14 March 1967, cols 1191
Parliament of Singapore, Obituary Speeches, vol. 25 of Parliamentary Debates: Official Report, 14 March 1967, cols 1197
Parliament of Singapore, Obituary Speeches, vol. 26 of Parliamentary Debates: Official Report, 2 November 1967, cols 312 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.