ஸ்ரீ வடபத்திர காளியம்மன் கோவில்

சிராங்கூன் ரோட்டில் அமைந்துள்ள ஸ்ரீவடபத்திர காளியம்மன் கோவில் ஒரு நூற்றாண்டுக்கும் மேற்பட்ட பழமை வாய்ந்தது. குடும்பங்கள் நிர்வகித்துவந்த கோவில்களுள் இதுவும் ஒன்று.

கோவில் தற்போது அமைந்துள்ள வட்டாரத்திலும் ‘மண்ணுமலை’ என அழைக்கப்பட்ட பொத்தோங் பாசிர் பகுதியிலும் வசித்த இந்துக்களால் 1870 வாக்கில் ஆலயம் தோற்றுவிக்கப்பட்டது. அப்போது சிறு மரக்கோவிலாக இருந்த ஆலயம், 1935 வாக்கில் ஓட்டுக்கூரை வேயப்பட்ட கட்டடமானது. தொடர்ந்து, 1930-களின் பிற்பகுதியில், சிங்கப்பூர்த் துறைமுக வாரியத்தின் முக்கிய ஒப்பந்தக்காரராகப் பணியாற்றிய பி. கோவிந்தசாமி செட்டியாரிடம் கோவில் நிர்வாகம் ஒப்படைக்கப்பட்டது. விரிவுபடுத்தப்பட்ட ஆலயத்தில் 1943-இல் பெரியாச்சி, மதுரை வீரன், முனீஸ்வரன் சன்னதிகளும் சேர்க்கப்பட்டன. கோவிந்தசாமியின் மேற்பார்வையில் 1947-ஆம் ஆண்டு கோயிலின் மறுசீரமைப்பும் குடமுழுக்கும் நிறைவேறியது. அவர் 1948-இல் இறந்தபிறகு, கோவிலின் நிர்வாகம் அவரது மருமகன் எஸ்.எல். பெருமாளிடம் ஒப்படைக்கப்பட்டது. அவருடைய நிதியுதவி, புதிய பிரதான கோபுரத்திற்கும் கோவிலின் புதிய கட்டுமானத்திற்கும் வழியமைத்தது.

கிராஸ் (Cross) ஸ்ட்ரீட்டில் இயங்கிவந்த ராமர் பஜனை மடம் 1979-இல் இக்கோவிலுக்கு மாற்றப்பட்டது. அதன்பின் நுழைவாயிலில் கருடன், அனுமன் சிலைகளும் சேர்க்கப்பட்டன. இறைவழிபாடு மட்டுமின்றிச் சமூக நிகழ்ச்சிகளும் இடம்பெறும் வகையில் ஆலயத்தில் நான்கடுக்குப் பல்நோக்கு மண்டபம் 2005-இல் கட்டப்பட்டது. பிறகு, 2015-இல் இரண்டு மில்லியன் வெள்ளி செலவில் புதுப்பிப்புப் பணிகள் மேற்கொள்ளப்பட்டு 2016-இல் குடமுழுக்கு செய்யப்பட்டது. 



மேல்விவரங்களுக்கு
“Sri Vadapathira Kaliamman Temple.” Roots.sg. Accessed on 1 August 2025. https://www.roots.gov.sg/places/places-landing/Places/landmarks/little-india-heritage-trail-walk-of-faiths/sri-vadapathira-kaliamman-temple. 
Zaccheus, Melody. “Serangoon Rd Temple Gets More Shrines.” The Straits Times, 8 December 2016. 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.