வில்சன் டேவிட்

"சிங்கப்பூர் எல்விஸ் பிரெஸ்லி" எனவும் "சிங்கப்பூர் ராக் அண்ட் ரோல் மன்னர்" எனவும் பிரபலமாக அறியப்படும் வில்சன் டேவிட் (பி. 1940), எல்விஸ் பிரெஸ்லியைக் கொண்டாடும் நிகழ்ச்சிகளுக்காகப் பெயர்பெற்ற சிங்கப்பூர்த் தமிழ் பாடகர். அமெரிக்கப் பண்பாட்டுச் சின்னமான எல்விஸ் பிரெஸ்லியின் தோற்றம், குரல், கவர்ந்திழுக்கும் ஆளுமை முதலியவற்றைப் பிரதிபலித்து 30 ஆண்டுகளுக்கும் மேலான தனது தொழில் வாழ்க்கையில் அவர் பல்லாயிரம் பார்வையாளர்களை வசீகரித்தார். 

இந்தியாவின் சிதம்பரத்திலிருந்து 1930-களில் சிங்கப்பூருக்குக் குடிபெயர்ந்த பெற்றோருக்கு டேவிட் பிறந்தார். சிறு வயதிலிருந்தே, 1950-கள், 1960-களில் பிரபலமான பாடல்களைச் சமூக நிகழ்வுகளில் பாடுவதில் அவர் தம் திறமையைக் காட்டினார். பதின்ம வயதில் அவரும் அவரது பள்ளி நண்பர்களும் காபிக் கடைகளில் எல்விஸின் பாடல்களைக் கேட்டபோதுதான் அந்த அமெரிக்கப் பாடகரைப்பற்றி அவருக்குத் தெரியவந்தது. அந்த ஆர்வம் விரைவிலேயே அவரது தொழில் வாழ்க்கையை நிர்ணயிக்கும் பேரார்வமாக வளர்ந்தது. 

தொடர்ந்து 1950-களின் பிற்பகுதியிலிருந்து, ஓஷன் பார்க் ஹோட்டல், ஸீ  வியூ ஹோட்டல், சிங்கப்பூர் பேட்மிண்டன் ஹால் முதலிய பிரபலமான இடங்களில் அவர் நடத்திய நிகழ்ச்சிகளுக்குக் கூட்டம் நிரம்பிவழிந்தது. அடுத்த சில ஆண்டுகளிலேயே மிகவும் புகழ்பெற்ற அவர், 1964-இல் அன்றைய ஆகப்பெரிய மேடையாக இருந்த தேசிய அரங்கத்தில் மாபெரும் நிகழ்ச்சியை நடத்தினார். மேலும், புகழ்பெற்ற பன்னாட்டுக் கலைஞர்களின் நிகழ்ச்சிகளில் தொடக்கப் படைப்பாக அவரது நிகழ்ச்சி இடம்பெற்றது.

எல்விஸ் பிரெஸ்லியின் குரலையும் மேடை ஆளுமையையும் பிரதிபலிக்கும் திறன் அவருக்கு பரவலான பாராட்டைப் பெற்றுத்தந்தது. இருபதுக்கும் மேற்பட்ட பாடல்களைக் கொண்ட அமர்க்களமான நிகழ்ச்சிகளுக்கு 7,000 பேர் வரை குவிந்தனர். ஒரு நிகழ்ச்சிக்கு 2,000 வெள்ளி சம்பாதித்தார். அது அவரையொத்த கலைஞர்களின் வழக்கமான வருவாயைவிட மிக அதிகம். கலிஃபோர்னிய நண்பரால் வடிவமைக்கப்பட்ட அவரது எல்விஸ் பிரெஸ்லி உடைகள், அவரது மேடைக் கவர்ச்சியைக் கூட்டின; இறுதியில் சிங்கப்பூரின் தேசிய மரபுடைமைக் கழகத்திற்கு நன்கொடையாக வழங்கப்பட்டன. 

வில்சனின் மேடை வாழ்க்கை, எல்விஸின் வாழ்க்கையைப் பலவழிகளில் பிரதிபலித்தது. அதே சிகை அலங்காரம், கிருதா, மேடைப்பாவனைகள் எனப் பலவற்றைப் பின்பற்றினார். எல்விஸ் நிகழ்ச்சியை நேரடியாக ஒருபோதும் பார்த்ததில்லை என்றாலும் கடுமையான பயிற்சியாலும் பற்றாலும் எல்விஸாகவே மாறினார். 

வில்சனின் மனிதநேயமும் கொடைத்தன்மையும் குறிப்பிடத்தக்கவை. நிதி திரட்டுவதற்காக அவர் பாடல் தொகுப்புகளை வெளியிட்டார். தம் நிகழ்ச்சிகள் மூலம் பீட்டி உயர்நிலைப் பள்ளி, வலிப்புவாதக் குழந்தைகள் சங்கம் முதலிய அமைப்புகளுக்குக் கணிசமான நிதி திரட்டினார்.

சிங்கப்பூரின் இசைத் துறைக்கு வில்சன் டேவிட்டின் பங்களிப்பு, குறிப்பாக எல்விஸ் பிரெஸ்லியின் உருவகம், ஓர் அழியாத முத்திரையை விட்டுச்சென்றுள்ளது. மேடை நிகழ்ச்சிகள்முதல் மனிதநேய முயற்சிகள்வரை, சமூகங்களை ஊக்குவிக்கவும் ஒன்றிணைக்கவும் இசையின் சக்தியை எப்படிக் கையாள்வது என்பதற்கு அவர் ஓர் எடுத்துக்காட்டு. 



மேல்விவரங்களுக்கு
Koh, Tommy, Timothy Auger and Jimmy Yap. Singapore: The Encyclopedia. Singapore: Editions Didier Millet, 2007
“B/W photograph showing Wilson David Performing at the Paya Lebar airport.” Roots.sg. Accessed on 1 August 2025. https://www.roots.gov.sg/Collection-Landing/listing/1523764 

To read in English 

முகப்புப் பக்கத்திற்குச் செல்ல 

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.