சாந்தா பாஸ்கர்

சாந்தா பாஸ்கர் (1939-2022) சிங்கப்பூர்க் கலைத்துறைக்குச் சுமார் 70 ஆண்டுகள் தொண்டாற்றிய இந்தியப் பாரம்பரிய நடனக் கலைஞர். சிங்கப்பூரின் ஆக உயரிய கலை விருதான கலாசாரப் பதக்கத்தைப் பெற்றவர். 

இந்தியாவின் கேரளாவில் பிறந்த பாங்கியம்மா சாந்தம்மா, பாஸ்கர் கலைக்கூடத்தின் நிறுவனர் கே.பி. பாஸ்கரை 1955-இல் மணந்து சிங்கப்பூருக்குக் குடிபெயர்ந்தார். அதன்பின் சாந்தா பாஸ்கர் என்றழைக்கப்பட்டார். மோகினியாட்டம், கதகளி, பரதநாட்டியம் உள்ளிட்டப் பல்வேறு பாரம்பரிய இந்திய நடன வடிவங்களில் தேர்ச்சி பெற்ற சாந்தா, நடனக் கலைஞராகவும் இயக்குநராகவும் நிர்வாகியாகவும் விளங்கினார். பல நடனக் கலைஞர்களை உருவாக்கினார். உள்ளூரிலும் வெளிநாடுகளிலும் ஏராளமான நிகழ்ச்சிகளைப் படைத்தார். 

மலாய், சீன, தாய்லாந்து நடனங்களின் சிறந்த அம்சங்களை இந்தியப் பாரம்பரிய நடன வடிவங்களுடன் இணைத்தது அவரது புத்தாக்க அணுகுமுறைகளுள் முக்கியமானது. சீனக் காவியங்கள், ஷேக்ஸ்பியர் நாடகங்கள், உள்ளூர்க் கவிதைககள் எனப் பல்வேறு கருப்பொருள்களை ஒட்டிப் படைப்புகளை உருவாக்கிய அவர், சிங்கப்பூர்த் தேசியப் பல்கலைக்கழகத்தோடு பணியாற்றியபோது குவாண்டம் தொழில்நுட்பம், புவியியல் துறை, கணிதத் துறை என அறிவியல் துறைகளைச் சார்ந்தவர்களோடு இணைந்து புதுப்புது நடனப் படைப்புகளையும் தயக்கமின்றி அரங்கேற்றினார். சம்பவ்னா (2016), மாய யாத்ரா (2018) ஆகிய படைப்புகள் அவற்றுக்கு எடுத்துக்காட்டுகள். பல்கலைக்கழகத்தில் 40 ஆண்டுகளுக்கும் மேலாகப் பல தலைமுறை மாணவர்களை வளர்த்தெடுத்த அவர், அதன் ஆக நீண்டகாலக் கலை ஆசிரியராகப் போற்றப்படுகிறார். 

புகழ்பெற்ற நாடகாசிரியர் கோ பாவ் கூன் எழுதிய The Silly Little Girl and The Old Tree என்னும் நாடகத்தை விருக்‌ஷா என்னும் பெயரில் பரதநாட்டிய வடிவில் படைத்த பெருமையும் அவருக்கு உண்டு. கணவர் பாஸ்கரின் (1925-2013) மறைவுக்குப் பின்னர் கலைக்கூடத்தைத் தொடர்ந்து வழிநடத்திய சாந்தா தம் கலைச்சேவைகளுக்காகக் கலாசாரப் பதக்கத்தை 1990-இல் பெற்றார். பொதுச் சேவை நட்சத்திர விருதை 2016-ஆம் ஆண்டிலும் பாராட்டுப் பணிப் பதக்கத்தை 2021-ஆம் ஆண்டிலும் பெற்ற அவர், சிங்கப்பூர் மாதர் புகழரங்கில் 2012-இல் சேர்த்துக்கொள்ளப்பட்டார். பாஸ்கர் கலைக்கூடத்திற்கு, தேசிய மரபுடைமைக் கழகம் தொட்டுணர முடியாத கலாசார மரபுடைமைக் காப்பாளர் விருது வழங்கிச் சிறப்பித்துள்ளது. 

சிங்கப்பூரின் கலையுலகு துடிப்போடு திகழ உதவும் வகையில், மரபு, பல்பண்பாட்டு உள்ளுணர்வு, ‘அனைவரும் கலைகளை அனுபவிக்க வேண்டும்’ என்னும் கோட்பாடு இவையனைத்தையும் உள்ளடக்கி இந்தியப் பாரம்பரிய நடனப் படைப்புகளை அமைத்த சாந்தா பாஸ்கர் கலைத்துறை முன்னோடிகளுள் ஒருவராக நினைவுகூரப்படுகிறார்.



மேல்விவரங்களுக்கு
“Our Founders.” Bhaskars Arts Academy. Accessed 1 August 2025. https://www.bhaskarsartsacademy.com/founder.cfm 
 “A Legacy of Tradition, Passion, and Lifelong Learning: Remembering the Doyen of Traditional Indian Dance, Mrs Santha Bhaskar (1939 – 2022).” NUS Office of Student Affairs, 27 February 2022. https://cfa.nus.edu.sg/spotlight/remembering-mrs-bhaskar/ 
Wong, Chee Meng, and N. Nedumaran. A Quest for Dance: The Life and Times of Singapore Dance Pioneer K.P. Bhaskar. Singapore: Select Publishing, 2015.

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.