பாஸ்கர் கலைக்கூடம்

பாஸ்கர் கலைக்கூடம் 1950-களிலிருந்து இந்திய நுண்கலைகளைக் கற்பிக்கும், படைக்கும் நிறுவனமாகச் செயல்பட்டுவருகிறது.  நடன அமைப்பாளரும் நடனக் கலைஞருமான கே.பி. பாஸ்கர் (கிருஷ்ணா பிள்ளை பாஸ்கர், 1925-2013), 1940-களில், பாஸ்கர்ஸ் அகாடமி ஆஃப் டான்ஸ் என்னும் அமைப்பை இந்தியாவில் நிறுவியிருந்தார். அவர் 1952-இல் சிங்கப்பூருக்கு இடம் பெயர்ந்தபோது, அதே ஆண்டில், இங்கு, தம் முதல் நடன வகுப்புகளைச் சுமார் 40 மாணவர்களுக்கு ஒரு சிறு பாடத்திட்டமாக நடத்தத் தொடங்கினார். அடுத்த இரண்டு ஆண்டுகளிலேயே, விக்டோரியா அரங்கத்தில் முதல் முழு நீள நடனத் தயாரிப்பான சகுந்தலாவை அரங்கேற்றும் அளவிற்கு அவரது முன்னேற்றம் அமைந்தது.

தொடர்ந்து, 1955-ஆம் ஆண்டில், அவர் பாங்கியம்மா சாந்தம்மாவை (1939-2022) மணந்தார். அப்போதிருந்து, அவர்தம் மனைவி சாந்தா பாஸ்கர் என்று அழைக்கப்பட்டார். அடுத்தடுத்த ஆண்டுகளில், இத்தம்பதியர் சிங்கப்பூரிலும் அன்றைய மலாயாவிலும் தம் பள்ளியின் வகுப்புகளையும் படைப்புகளையும் விரிவுபடுத்தினர். பாஸ்கர்ஸ் அகாடமி ஆஃப் டான்ஸ், 1988-இல் நிருத்யாலயா கவின் கழகம் எனப் பெயர்மாற்றம் கண்டது. அக்கழகம், சுமார் பத்தாண்டுகள் கழித்து, 1999-இல், பாஸ்கர் கலைக்கூடம் என்ற பெயரில் ஒரு தொழில் நிறுவனத்தை அமைத்துத் தன் படைப்புகளை அரங்கேற்றியது. நிருத்யாலயா கவின் கழகம் ஒரு பள்ளியாகச் செயல்பட்டு இந்திய நடன, இசை, நாடக வகுப்புகளோடு, யோகா வகுப்புகளையும் நடத்துகிறது.

கழக மாணவர்களுள் திறன்மிக்கவர்கள் தேர்ந்தெடுக்கப்பட்டு, கலைக்கூடத்தின் முக்கிய நடனமணிகளாகச் சேர்த்துக்கொள்ளப்படுகின்றனர். இத்திட்டம் ஆழமான, முழுமையான பயிற்சிகளைக் கொடுப்பதன்மூலம், இளம் நடனமணிகள் தம் திறமைகளை வளப்படுத்திக்கொள்ள உதவுகிறது. அதேபோன்று, இசைத்துறை மாணவர்களுக்கும் வாய்ப்புகளும் பயிற்சியும் அளிக்கப்பட்டு, அவர்கள் கலைக்கூடத்தின் ஸ்வாதி சேர்ந்திசைக்குழுவில் சேர்த்துக்கொள்ளப்படுகிறார்கள். கழக மாணவர்களுக்கு நிறுவனத்தின் நிகழ்வுகளோடு, வெளியில் நடக்கும் பண்பாட்டு நிகழ்வுகளிலும் கோவில் திருவிழாக்களிலும் வாய்ப்புகள் வழங்கப்படுகின்றன. சங்கம், 2025-ஆம் ஆண்டுவாக்கில் 800-க்கும் மேற்பட்ட மாணவர்களைக் கொண்டிருந்தது. மேலும் 120-க்கும் மேற்பட்ட நடனம், இசை அரங்கேற்றங்களை நடத்தியிருந்தது. கலைக்கூடம், கழகம் இரண்டும் இணைந்து, பாரம்பரிய இந்தியக் கலைப்படைப்புகளை உருவாக்குதல், படைத்தல், ஊக்குவித்தல் எனப் பல பணிகளைத் தொடர்கின்றன. பாஸ்கர் தம்பதியரின் மரபு, சிங்கப்பூரின் பல்பண்பாட்டு உள்ளுணர்வு, "அனைவரும் கலைகளை அனுபவிக்க வேண்டும்” என்னும் கோட்பாடு – இவையனைத்தும் இவ்வமைப்புகளின் படைப்புகளில் பிரதிபலிக்கின்றன. சிங்கப்பூரின் கலையுலகு துடிப்போடு திகழ உதவும் வகையில், பாஸ்கர் கலைக்கூடம் ஆண்டுதோறும் மூன்று அல்லது நான்கு படைப்புத் தொகுப்புகளை வழங்கிவருகின்றது.

கலைகள் மூலம் பண்பாடுகளை இணைப்பதில் நாட்டம் கொண்டுள்ள பாஸ்கர் கலைக்கூடம், சீன, மலாய்ப் பண்பாட்டு இழைகளை இந்தியப் பாரம்பரியப் படைப்புகளில் சேர்த்து நெய்கிறது. அத்தகைய பல்பண்பாடுப் படைப்புகளில் குறிப்பிடத்தக்க இரண்டு பட்டாம்பூச்சிக் காதலர்கள், சிங்கை சதிர் ஆகியவை. மேலும், தாய்லாந்து, கம்போடியா, இந்தோனேசியா ஆகிய வெளிநாடுகளுடன் இணைந்து முறையே மனோஹ்ரா, பிரிஹானல்லா, விநாயகா என்னும் பல்பண்பாட்டு நாட்டிய நாடகங்களும் உருவாக்கப்பட்டிருக்கின்றன. அதேபோன்று, தென்கிழக்காசியா, சீனா, இந்தியா, ஜப்பான், கனடா, மெக்சிகோ, நியூசிலாந்து எனப் பலநாடுகளுக்கும் சென்று படைப்புகளை அரங்கேற்றும்போது, அந்தந்த நாடுகளின் பண்பாட்டுக் கூறுகளையும் உள்வாங்கி நிகழ்ச்சிகளை உருவாக்கியுள்ளது அந்த அமைப்பு. பாரம்பரியக் கலை வடிவங்களைப் பாதுகாக்கும் நோக்கோடு, இந்தியாவிற்கு வெளியே கதகளி, தெருக்கூத்து நிகழ்ச்சிகளை வழக்கமாக நடத்தும் ஒருசில கலை நிறுவனங்களுள், பாஸ்கர் கலைக்கூடமும் ஒன்றாகும்.

சிங்கப்பூரில் கலைத்துறையில் அவர்கள் செய்த பங்களிப்பிற்காக, பாஸ்கர் தம்பதியினருக்குப் பல விருதுகள் வழங்கப்பட்டுள்ளன. குறிப்பாக, பாராட்டுப் பணிப் பதக்கம் 1962-இல் கே.பி. பாஸ்கருக்கும், 2021-இல் சாந்தா பாஸ்கருக்கும் வழங்கப்பட்டது. சாந்தா பாஸ்கர் 1990-இல் கலாசாரப் பதக்கத்தையும் பெற்றார். பின்னர், 2021-இல் சிங்கப்பூர் மாதர் புகழரங்கு என்னும் மதிப்புமிக்க பட்டியலில் சேர்த்துக்கொள்ளப்பட்டார். மேலும், பாஸ்கர் கலைக்கூடத்திற்கு, தேசிய மரபுடைமைக் கழகம் தொட்டுணர முடியாத கலாசார மரபுடைமைக் காப்பாளர் விருது வழங்கிச் சிறப்பித்துள்ளது.

பாஸ்கர் தம்பதிகள் மறைவுக்குப் பிறகு, அவர்தம் மகள் மீனாட்சி பாஸ்கர் கலைக்கூடத்தை வழிநடத்துகிறார்.



மேல்விவரங்களுக்கு
Bhaskar’s Arts Academy. Accessed 1 August 2025. https://www.bhaskarsartsacademy.com
Wong, Chee Meng, and N. Nedumaran. A Quest for Dance: The Life and Times of Singapore Dance Pioneer K.P. Bhaskar. Singapore: Select Publishing, 2015. (Call no. RSING English 793.3192 BHA)

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.