தாமரை

தாமரை ஓர் அரசியல், சமூக, கலை, இலக்கிய வார இதழாக 1977 முதல் வெளிவந்தது. ஆசிரியர், தி. செல்வகணபதி. வெளியீட்டாளர், சுலோச்சனா செல்வகணபதி. தலையங்கம், தமிழக நிலைமை, தாமரைத் தடாகம், நினைத்துப் பார்த்தால், பூவையர் பூங்கா, கவிதை, சிறுகதை, தொடர்கதை, கட்டுரை, தொடர்கட்டுரை முதலிய பகுதிகளோடு 16 முதல் 32 பக்கம்வரை வெவ்வேறு அளவுகளில் இதழ் வெளிவந்தது. வடிவமைப்பிலும் அவ்வப்போது மாற்றம்கண்ட இதழ், 430 ரேஸ் கோர்ஸ் ரோடு என்னும் முகவரியிலிருந்த கணேஷ் அச்சகத்தில் அச்சிட்டு வெளியிடப்பட்டது.

தமிழிலக்கணத்தின் விரிந்த நோக்கங்களை எடுத்துரைக்கும் “தமிழின் இன்றைய நிலை” போன்ற கட்டுரைகளை வெளியிட்ட இதழ் அதேவேளையில் சிங்கப்பூரின் வளர்ச்சிக்கு அவசியம் எனக் கருதப்பட்ட இருமொழித்திறனை வலியுறுத்தும் “ஆங்கிலமும் தாய்மொழியும்”, “இருமொழிக் கல்வித்திட்டம் – தமிழ்ச் சமூகத்தின் பொறுப்பு” போன்ற கட்டுரைகளையும் வெளியிட்டது. தொடர் கட்டுரைகள் பெரும்பாலும் இலக்கிய ரசனை, பழந்தமிழர் வாழ்க்கை ஆகியவற்றைக் குறித்து அமைந்திருந்தன. தலையங்கங்கள் சிங்கப்பூரர்களிடம் ஒற்றுமையையும் தேச முன்னேற்றத்தில் தமிழர் கடப்பாட்டையும் வலியுறுத்தின. எடுத்துக்காட்டாக, “ஒவ்வொருவருக்கும் பங்கும் பொறுப்பும் உண்டு” என்ற தலையங்கத்தைக் குறிப்பிடலாம்.

தாமரைத் தடாகம் என்னும் பகுதியில் வாசகர்களின் கேள்விகளும் அவற்றுக்கான ஆசிரியரின் பதில்களும் இடம்பெற்றன. சிங்கப்பூர் வரலாறு குறித்த கேள்விகளுக்கு முக்கியத்துவம் அளிக்கப்பட்டது. நினைத்துப் பார்த்தால் என்னும் பகுதியில் நாட்டு நடப்புகளையும் பூவையர் பூங்காவில் மகளிர் நல்வாழ்வுக்கான செய்திகளையும் தாமரை வெளியிட்டுள்ளது. நாடாளுமன்ற விவாதங்கள், இலக்கிய நூல் வெளியீடு குறித்த தகவல்களும் இடம்பெற்றன. இதழ் நின்றுபோன காலம், காரணங்கள் குறித்த தகவல்கள் தெரியவில்லை.



மேல்விவரங்களுக்கு
திருமுருகானந்தம், கோட்டி. சிங்கப்பூர் இதழியல் வரலாறு. சென்னை: பாஸ் ஃபவுண்டேஷன், 2019

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.