அபிஷேகநாதன், பால்

பால் செல்வராஜ் அபிஷேகநாதன் (1914 – 2011) சிங்கப்பூரின் இசை வரலாற்று முன்னோடி. சிங்கப்பூரின் "முதுபெரும் இசை நாயகன்" என்று பரவலாக அறியப்பட்டார். சிங்கப்பூரின் பல்லிசை, பல்குரலிசை பாரம்பரியத்தைக் கட்டமைப்பதிலும் மேற்கத்திய செவ்விசையை உள்ளூர் ரசிகர்களுக்குக் கொண்டுசெல்வதிலும் முக்கியப்பங்கு வகித்தார். பினாங்கில் பிறந்து, இரண்டு வயதிலிருந்து சிங்கப்பூரில் வளர்ந்த அபிஷேகநாதன், இளமையிலேயே இசையில் ஆர்வம் கொண்டிருந்தார். நான்கு வயதிலேயே வயலின் கற்றுக்கொண்டதோடு, செயிண்ட் ஆண்ட்ரூஸ் தேவாலயத்தில் பல்குரலிசைக் குழுவில் பாடினார். சிராங்கூன் ஆங்கிலப் பள்ளி, செயிண்ட் ஆண்ட்ரூஸ் பள்ளி, ராஃபிள்ஸ் கல்லூரி ஆகியவற்றில் பயின்று, 1934-இல் கலைப் பட்டயம் பெற்றார். ஜப்பானியர் ஆக்கிரமிப்பின்போது, ஜப்பானியர் தலைமையிலான சியோனான் கொக்கைடோ பல்லிசைக்குழுவில் வயலின் வாசித்தார். இசைக்குழுவின் தலைவர் கலந்துகொள்ள இயலாத ஒரு சூழலில் இசை நடத்துனராகத் தம் முதல் அனுபவத்தைப் பெற்றார். பிறகு, 1947-இல், இங்கிலாந்தில் இசை பயில, பிரிட்டிஷ் கவுன்சில் உதவித்தொகை பெற்ற முதல் சிங்கப்பூரர் என்ற பெருமையைப் பெற்றார். அங்கு லண்டனின் கில்டுஹால் இசைப் பள்ளியில், பாடகராகவும் இசை நடத்துநராகவும் பயிற்சி பெற்றார்.

அபிஷேகநாதன் பல்வேறு பள்ளிகளில் ஆங்கில மொழியும் இசையும் கற்பிக்கத் தொடங்கினார். கேலாங் ஆங்கிலப் பள்ளியில், 1935-இல், சிங்கப்பூரின் முதல் பள்ளி கீதத்தை அறிமுகப்படுத்தினார். மேலும், இசை கற்பித்தலின் எதிர்காலத்தை வடிவமைக்கும் பல முன்னோடித் திட்டங்களை மேற்கொண்டார். விக்டோரியா பள்ளி (1959–1962), ஆசிரியர் பயிற்சிக் கல்லூரி (1963–1968) ஆகியவற்றின் முதல்வராக உயர்ந்த அவர், பிறகு பள்ளிகளின் தலைமைக் கண்காணிப்பாளராக நியமிக்கப்பட்டார். சிங்கப்பூர் சேம்பர் ஆன்சாம்பில் எனப்படும், முதல் பெரிய உள்ளூர்ப் பல்லிசை, பல்குரலிசைக்குழு ஒன்றைச் சிங்கப்பூரர் தலைமையின்கீழ் 1950-இல் உருவாக்கியது அவரது இசை வாழ்க்கையில் ஒரு முக்கிய மைல்கல். அது சுமார் 30 ஆண்டுகளாகச் சிங்கப்பூரில் மிகவும் துடிப்பான குழுவாக வளர்ந்து, உள்ளூர்த் திறனாளர்களையும் வளர்த்து, சிறந்த இசைப் படைப்புகளை வழங்கியது. இன்றைய சிங்கப்பூர் இளையர் பல்லிசைக்குழுவின் முன்னோடியான சிங்கப்பூர் ஜூனியர் சிம்ஃபனி பல்லிசைக்குழுவை நிறுவி நடத்துவதிலும் அவர் முக்கியப்பங்கு வகித்தார். இசைக்கான அவரது அர்ப்பணிப்பு ஒருகட்டத்தில் பல்லாயிரம்பேர் பங்கேற்றச் சமூக நிகழ்வுகளாக விரிவடைந்தது. பில்லி கிரஹாம் 1978-ஆம் ஆண்டு கூட்டிய சுவிசேஷப் பேரணிக்காக 4,500 பேர் ஒருங்கிணைந்த பல்குரலிசைக் குழுவின் இசை நடத்துநரானார். கல்வி அமைச்சின் கலாசார விவகாரப் பிரிவின் தலைவராகவும் வட்டார இசை மாநாடுகளில் அமைச்சின் பேராளராகவும் பணியாற்றினார். கலைகளை நோக்கிப் பொதுமக்களை ஈர்க்கும் வகையில் இசையையும் இதர கலைகளையும் அவர் முன்னெடுத்தார்.

அபிஷேகநாதன் சிங்கப்பூர்த் தேசியப் பல்கலைக்கழகத்தில், 1979-இல், இசை நடவடிக்கைகளுக்கான மையத்தின் நிறுவன இயக்குநராக நியமிக்கப்பட்டார். அங்கு அவர் 1993 வரை பல்கலைக்கழகத்தின் சிம்ஃபனி பல்லிசைக்குழுவை நிறுவி வழிநடத்தினார். அவர்தம் வாழ்க்கைக் குறிப்புகளை, Notes Across the Years: Anecdotes from a Musical Life என்னும் புத்தகமாகப் பல்கலைக்கழகம் 2005-இல் வெளியிட்டது. நூல், 1920-கள் முதல் 1980-கள் வரை சிங்கப்பூரில் மேற்கத்திய செவ்விசை, கல்வி ஆகியவற்றின் வளர்ச்சியை விவரித்தது. மெம்பர் ஆஃப் தி ஆர்டர் ஆஃப் தி பிரிட்டிஷ் எம்பயர் (1956), கலாசாரப் பதக்கம் (1986), கொம்பாஸ் பாராட்டுப் பணி விருது (2006), சிங்கப்பூர்த் தேசியப் பல்கலைக்கழக முன்னாள் மாணவர் மிகச்சிறந்த சேவையாளர் விருது (2007) உள்ளிட்ட பல பாராட்டுகளைப் பெற்றார். அவர் 97 வயதில் காலமானார். அவரது குடும்பத்தினர், 2012-இல், அவரது நினைவாக,  சிங்கப்பூர்த் தேசியப் பல்கலைக்கழகத்தில் உன்னதக் கலைத்திறனுக்கான பால் அபிஷேகநாதன் மானியத்தை நிறுவினர். அது இசைக்கலைஞர்களையும் கல்வியாளர்களையும் தொடர்ந்து ஊக்கப்படுத்திவருகிறது. அவரது சகோதரர் அலெக்ஸ் அபிஷேகநாதனும் ஒரு புகழ்பெற்ற இசைக்கலைஞர். அவர் சிங்கப்பூரில் "கித்தாரின் தந்தை" என்று கருதப்படுகிறார்.



For More Information
Paul Abisheganaden. Accessed 1 August 2025. https://www.nlb.gov.sg/main/article-detail?cmsuuid=492eda72-11e0-400e-962f-368e14694bea
Paul Abisheganaden. Accessed 1 August 2025. https://www.esplanade.com/offstage/arts/paul-abisheganaden
Paul Abisheganaden. Accessed 1 August 2025. https://pianofortephilia.blogspot.com/2011/09/we-remember-paul-abisheganaden-1914.html#:~:text=Guildhall%20School%20of%20Music%20and,the%20education%20and%20administrative%20service 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.