கோவிந்தசாமி பிள்ளை, பி.

பி.ஜி.பி. என்று அழைக்கப்படும் பி. கோவிந்தசாமி பிள்ளை (1887-1980) புகழ்பெற்ற தொழிலதிபர், கொடைவள்ளல், மதிப்பிற்குரிய சமூகத் தலைவர்.

இந்தியாவின் பில்லாலி கிராமத்தில் பிறந்த பிள்ளை 1905-இல் சிங்கப்பூர் வந்து, ஒரு மளிகைக்கடையில் பணிபுரிந்து வணிக அனுபவத்தைப் பெற்றார். அக்கடையின் உரிமையாளர் 1929-இல் இறந்ததால் கடை விற்பனைக்கு வந்தபோது, பிள்ளை கடன் வாங்கி, பிஜிபி ஸ்டோர்ஸ் என்னும் பெயரில் கடையைத் தொடங்கி, மசாலா, எண்ணெய், தானியங்களை விற்கலானார். பின்னர் மாவு, மசாலா அரைக்கும் ஆலைகள், ஜவுளிக் கடைகள் எனத் தொழிலை விரிவுபடுத்தினார். சிராங்கூன் ரோடு, ரேஸ் கோர்ஸ் ரோடு, பஃபலோ ரோடு ஆகியவற்றில் உள்ள சொத்துகளில் பிள்ளை முதலீடு செய்தார். மேலும் 1937-இல் இந்திய வர்த்தக சபை அதிகாரப்பூர்வமாகப் பதிவு செய்யப்பட்டபோது பிள்ளை அதில் முக்கியப் பங்காற்றினார். அவர் 1939-இல் சமாதான நீதிபதி பொறுப்புக்கு நியமிக்கப்பட்டார்.

ஜப்பானிய ஆக்கிரமிப்பின்போது (1942-45), இந்தியாவில் இருந்த பிள்ளை தமது சொத்துகளையும் பொருள்களையும் இழந்தார். போருக்குப்பின் 1945-இல் சிங்கப்பூர் திரும்பிய அவர், இழந்த வணிகத்தை மீண்டும் கட்டியெழுப்பினார். சிங்கப்பூரில் மட்டுமின்றி ஜொகூர், மலாக்கா என மலேசியாவிலும் கடைகளைத் திறந்து தொழிலை விரிவுபடுத்தினார். பிள்ளை 1980-இல் தமது 93-வது வயதில் மாரடைப்பால் காலமானார்.

பிள்ளை அவர் வழங்கிய கொடைகளுக்காகவே பெரிதும் நினைவுகூரப்படுகிறார். ராமகிருஷ்ணா மிஷனுக்கு அவர் அளித்த நன்கொடை அவ்வமைப்பு 1952-இல் பார்ட்லி சாலையில் ஒரு புதிய இல்லத்தைக் கட்ட வழிவகுத்தது. ஸ்ரீ ஸ்ரீநிவாசப் பெருமாள் கோயிலின் சீரமைப்பு, மேம்பாட்டுப் பணிகளுக்கு அவர் 1960-களின் முற்பகுதியில் கணிசமான நன்கொடை வழங்கினார். அவற்றுள் சிங்கப்பூரின் பழமையான திருமண மண்டபங்களில் ஒன்றாக இன்று திகழும் பிஜிபி மண்டபமும்  அடங்கும். அதனை 1965-இல் சிங்கப்பூரின் முதல் அதிபரான யூசுப் பின் இஷாக் அதிகாரப்பூர்வமாகத் திறந்துவைத்தார். மலாயாப் பல்கலைக்கழகம், மவுண்ட் அல்வெர்னியா மருத்துவமனை, காந்தி நினைவு மண்டபம், இந்தியர் சங்கம் போன்ற பல நிறுவனங்களுக்கும் பிள்ளை நன்கொடை அளித்தார்.

சிங்கப்பூரின் வளர்ச்சிக்கும் இந்தியச் சமூகத்திற்கும் பல்வேறு வழிகளில் ஆற்றிய சேவைக்குப் பிள்ளை அரசாங்கத்தால் கௌரவிக்கப்பட்டார். சிங்கப்பூர் போஸ்ட் 2001-இல் அவரது படத்தைக் கொண்ட அஞ்சல் தலைகளை வெளியிட்டது. சிங்கப்பூரின் இருநூற்றாண்டு நிறைவையொட்டி 2019-ஆம் ஆண்டு அதிபர் ஹலிமா யாக்கோப் வெளியிட்ட சிறப்பு 20 வெள்ளி நோட்டில் பிள்ளையின் படம் பொறிக்கப்பட்டது. நாட்டு நிர்மாணத்திற்குக் குறிப்பிடத்தக்கப் பங்காற்றிய ஏழு முன்னோடிகளுள் ஒருவராகப் பிள்ளையின் உருவப்படம் அதில் இடம்பெற்றிருந்தது. 



மேல்விவரங்களுக்கு
Bhattacharya, Jayati. Beyond the Myth: Indian Business Communities in Singapore. Singapore: Institute of Southeast Asian Studies, 2011. Pages 57–58. (Call no. RSING English 338.708991405957 BHA)
Cheong, Suk-Wai. The Sound of Memories: Recordings from the Oral History Centre, Singapore. Singapore: National Archives of Singapore; World Scientific Publishing Co. Pte. Ltd., 2019. Pages 30–32. (Call no. RSING English 959.57)
Goh, Joek Khang, Huey Huey Lee, and Helmy Tanjanika. A Study of Singapore Indian Pioneers: Persistence and Change of Organisational and Business Strategies. Singapore: Nanyang Technological University, 2001. Page 98. (Call no. RCLOS English 338.708991405957 GOH)
Gopal, Nalina. Once upon a Time in Little India. Singapore: Indian Heritage Centre, 2019. Page 123. (Call no. RSING English 305.8914 ONC)
Lim, Lee Chin. Pioneers of Singapore: Builders of Our Land. Singapore: Asiapac, 2004. Pages 114–116. (Call no. RSING English 959.570099 LIM -[HIS])
Monetary Authority of Singapore. Annex A: Profiles of Pioneering Individuals. Revised edition. Singapore: Monetary Authority of Singapore, 5 June 2019. https://www.mas.gov.sg/-/media/annex-a-profiles-of-pioneering-individuals-revised.pdf.
Monetary Authority of Singapore. “New $20 Note to Commemorate Singapore’s Bicentennial.” 5 June 2019. https://www.mas.gov.sg/news/media-releases/2019/new-20-note-to-commemorate-singapores-bicentennial.
எஸ்.பி.பன்னீர்செல்வம். சிங்கப்பூர் தமிழ் முன்னோடிகள்: ஒரு சமூக வரலாற்று நூல். சிங்கப்பூர்: தங்கமின் பதிப்பாக்கம், 2014. (Call no. RSING Tamil 305.8914105957 PAN)

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.