சூலியா ஸ்ட்ரீட்

சிங்கப்பூரின் மத்திய வர்த்தக வட்டாரத்தில் சூலியா ஸ்ட்ரீட் அமைந்துள்ளது. சோழமண்டலக் கரையிலிருந்து சிங்கப்பூருக்குக் குடிபெயர்ந்தவர்களை நினைவுகூரும் வகையில் அந்தப் பெயர் சூட்டப்பட்டது. அதற்குமுன் கிளிங் ஸ்ட்ரீட் என அது வழங்கப்பட்டது. கத்தி விற்கும் கடைகள் அந்த வீதியில் இருந்ததால், பேச்சு வழங்கில் ‘கத்திக்கடைச் சடக்கு’ எனவும் குறிப்பிடப்பட்டது.  

தொடக்கத்தில் சோழமண்டலக் கரையிலிருந்து வந்தவர்களுக்குப் பெருமை தரும் அடையாளமாக இருந்த ‘கிளிங்’ எனும் சொல் பின்னாளில் இந்தியர்களைக் குறிப்பிடும் இழிசொல்லாகக் கருதப்பட்டது. அதன் காரணமாக 1920-களில் சிங்கப்பூர் இந்தியர் சங்கம் சாலையின் பெயரை மாற்றவேண்டும் எனப் பரிந்துரைத்தது. அதைத்தொடர்ந்து 24 ஜூன் 1921 அன்று நடைபெற்ற நகரமன்ற ஆணையர்களின் கூட்டத்தில் இரு மாற்றுப் பெயர்கள் பரிசீலிக்கப்பட்டன. ஒன்று, பழைய பெயரைப்போலவே ஒலிக்கும் கிங் ஸ்ட்ரீட். மற்றது, சிங்கப்பூர் இந்தியர்களுள் பெரும்பாலானோர் தென்னிந்தியர்கள் என்பதாலும் அவர்கள் சூலியா என்று அறியப்பட்டதாலும் அந்தப் பெயரையே வைக்கலாம் என்று பரிந்துரைக்கப்பட்ட, சூலியா ஸ்ட்ரீட். அந்தப் பெயரே தேர்ந்தெடுக்கப்பட்டு, 1 ஜனவரி 1922 அன்று நடைமுறைக்கு வந்தது. சூலியா ஸ்ட்ரீட் 1980கள் வரை இரண்டு மாடிக் கட்டடங்களும் இந்தியர் கடைகளும் கொண்ட வட்டாரமாக விளங்கியது. குறிப்பாக எழுதுபொருள்கள் விற்கும் பல தமிழ் முஸ்லிம் கடைகள் அங்கிருந்தன. தற்போது நிதி நிறுவனங்களும் வணிக வளாகங்களும் நிறைந்துள்ளன.



மேல்விவரங்களுக்கு
Cornelius, Vernon and Nor-Afidah Abd Rahman. "Chulia Street." Singapore Infopedia. Published  https://www.nlb.gov.sg/main/article-detail?cmsuuid=9c103061-e68c-4662-8946-8dbe86d9b651
R Savage, Victor, and S A Yeoh, Brenda. Singapore Street Names - A Study of Toponymics. 4th ed. Singapore: Marshall Cavendish Editions, 2022

To read in English

முகப்புப் பக்கத்திற்குச் செல்ல 

கலைக்களஞ்சியம்பற்றி அறிய

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.