ராஜா, வி.கே.

வி.கே. ராஜா என்று பரவலாக அறியப்படும் விஜய குமார் ராஜா (பி. 1957), அரசாங்கத் தலைமைச் சட்ட அதிகாரியாகவும் உச்ச நீதிமன்றத்தின் மேல்முறையீட்டு நீதிபதியாகவும் பணியாற்றியவர். சட்டத் துறையில் ஒரு புத்தாக்கச் சிந்தனையாளராகக் கருதப்படும் அவர், சிங்கப்பூரை ஒரு முக்கிய அனைத்துலக நடுவர் மையமாக உருவாக்குவதில் கணிசமான பங்களிப்பைச் செய்துள்ளார். 

ஆங்கிலோ-சீனப் பள்ளியில் பயின்ற ராஜா 1982-இல் சிங்கப்பூர்த் தேசியப் பல்கலைக்கழகத்தில் சட்டத் துறையில் இளநிலைப் பட்டம் பெற்றார். நான்காண்டுகளுக்குப் பிறகு, அவர் பிரிட்டனின் கேம்பிரிட்ஜ் பல்கலைக்கழகத்தில் உள்ள டிரினிட்டி ஹாலில் முதல் வகுப்புச் சிறப்புத் தேர்ச்சியுடன் சட்டத்துறையில் முதுநிலைப் பட்டம் பெற்றார். ராஜா & டான் நிறுவனத்தில் வழக்கறிஞர் தொழில்புரியத் தொடங்கிய ராஜா, 1987 முதல் 2003 வரை அதன் நிர்வாகப் பங்குதாரராக இருந்தார். தம் சட்ட நிபுணத்துவத்திற்காகப் பெயர் பெற்ற அவர், 1997-இல் மூத்த வழக்கறிஞராக நியமிக்கப்பட்ட முதல் வழக்கறிஞர் குழாத்தில் ஒருவர். அவர் சட்டத் தொழிலில் பெரிதும் வணிகம், பெருநிறுவனங்கள், நொடிப்பு சார்ந்த வழக்குகளில் கவனம் செலுத்தினார். மேலும், ராஜா பல்வேறு உள்ளூர், பன்னாட்டு நடுவர் மன்றங்களில் தீவிரமாகப் பங்கேற்று, வழக்குரைஞராகவும் நடுவராகவும் பணியாற்றினார். 

ராஜா நீதித்துறை ஆணையராக 2004-ஆம் ஆண்டின் முற்பகுதியில் நியமிக்கப்பட்டு அவ்வாண்டின் இறுதியில் உச்ச நீதிமன்ற நீதிபதி பதவிக்கு விரைவாக உயர்த்தப்பட்டார். தொடர்ந்து 2007-இல் மேல்முறையீட்டு நீதிமன்ற நீதிபதியாக நியமிக்கப்பட்டார். நீதிபதியாகப் பதவிவகித்த காலத்தில், ராஜா பல வழக்குகளில் நீதிபதிகள் குழுவுக்குத் தலைமை தாங்கினார் அவர் 200-க்கும் மேற்பட்ட தீர்ப்புகளை எழுதியுள்ளார். பத்தாண்டுக் காலத்தில் அவரது பல தீர்ப்புகள், சிங்கப்பூர்ச் சட்டத் துறையின் வளர்ச்சிக்கு முக்கியப் பங்காற்றியுள்ளன. ராஜா, 2013-இல், நான்காவது வழக்கறிஞர் தேவை பரிந்துரைப்புக் குழுவின் தலைவராகப் பணியாற்றினார். இது சிங்கப்பூரின் மூன்றாவது சட்டப் பள்ளியை நிறுவுவதற்கு வழிவகுத்த குறிப்பிடத்தக்கப் பங்களிப்பாகும்.

ராஜா 2014-ஆம் ஆண்டில், சிங்கப்பூரின் எட்டாவது அரசாங்கச் சட்டத்துறைத் தலைவராகப் பொறுப்பேற்று, 2017 வரை அந்தப் பதவியில் இருந்தார். அதன்பிறகு மறுநியமனத்திற்குத் தகுதி பெற்றிருந்த போதிலும், அவர் பொதுச் சேவையிலிருந்து ஓய்வுபெற முடிவுசெய்தார். சட்டத்துறைத் தலைவராகப் பதவிவகித்த காலத்தில், அவர் தலைமைச் சட்ட அலுவலகக் கழகத்தை நிறுவினார். அது தலைமைச் சட்ட அலுவலகத்தில் உள்ள பல்வேறு பிரிவுகளின் நிபுணத்துவத் தரமேம்பாட்டை நோக்கமாகக் கொண்டது. 

பின்னர், ராஜா ஒரு முழுநேர பன்னாட்டு நடுவராக உருவெடுத்தார். பன்னாட்டு வர்த்தக சபையின் பன்னாட்டு நடுவர் நீதிமன்றத்தால் 2021-இல் துணைத் தலைவராக நியமிக்கப்பட்டார். பல குறிப்பிடத்தக்க பன்னாட்டு நடுவர் மன்றங்களில் அவர் ஆற்றிய பணி சிங்கப்பூரை ஒரு முக்கிய பன்னாட்டு நடுவர் மையமாக உருவாக்குவதற்குக் கணிசமாக உதவியுள்ளது. ராஜா செயற்கை நுண்ணறிவையும் தரவுகளையும் அறநெறிகளுக்கு உட்பட்டுப் பயன்படுத்துவது குறித்த சிங்கப்பூரின் ஆலோசனைக் குழுவிற்கு 2022-இல் தலைவராக நியமிக்கப்பட்டார். தலைமை நீதிபதி சுந்தரேஷ் மேனன், வி.கே. ராஜா ஒரு சிறந்த வழக்கறிஞர் மட்டுமின்றி சட்டத்துறையில் ஒரு புத்தாக்கச் சிந்தனையாளரும் ஆவார் என்று கூறியுள்ளார். 



மேல்விவரங்களுக்கு
Singapore International Arbitration Centre. “V. K. Rajah – Profile.” Accessed 1 August 2025. https://siac.org.sg/wp-content/uploads/2023/01/V-K-Rajah_Profile_January2022.pdf. 
Duxton Hill Chambers. “VK Rajah SC.” Accessed 1 August 2025. https://duxtonhill.net/advocates-arbitrators/vk-rajah-sc/. 
Loong, Lee Hsien. “Valedictory Letter from PM Lee Hsien Loong to Attorney-General V K Rajah SC,” Prime Minister’s Office Singapore, 9 January 2017. https://www.pmo.gov.sg/Newsroom/valedictory-letter-pm-lee-hsien-loong-attorney-general-v-k-rajah-sc. 

To read in English     

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.