ஸ்ரீ முனீஸ்வரன் ஆலயம்

குவீன்ஸ்டவுனில் 80 ஆண்டுகளுக்கு முன்பு முனியாண்டி கோயிலாக இருந்து, காலப்போக்கில் இடம்மாறி, தற்போது காமன்வெல்த் டிரைவில் ஸ்ரீ முனீஸ்வரன் ஆலயமாக மாற்றம்பெற்றுள்ள கோவில், தென்கிழக்காசியாவின் ஆகப்பெரிய முனீஸ்வரன் ஆலயமாக இருக்கலாம் என நம்பப்படுகிறது. சிங்கப்பூரில், 1930-களில், குவீன்ஸ்டவுன் வட்டாரத்தில் வசித்த மலாயன் ரயில்வே இந்து ஊழியர்கள், தம் ஆன்மிகத் தேவைகளுக்காக, ஓர் ஆலமரத்தின்கீழ் ஓர் ஈட்டியை வைத்து வழிபடத் தொடங்கினர். அவ்விடம் முனியாண்டி கோயில் என்று அழைக்கப்பட்டது.

குடிசையாக இருந்த சன்னதியைக் கோவிலாக மாற்றும் முயற்சிக்கு முதல் படியாக, 1961-இல், குடிசைக்கும் பிரதான சாலைக்கும் இடையில் மண்டிக்கிடந்த காட்டை வெட்டி, ஒரு நடைபாதை அமைக்கப்பட்டது. அடுத்தடுத்த ஆண்டுகளில், ரயில்வே ஊழியர் தர்மலிங்கம் என்பாரின் தலைமையில் ஒரு செயற்குழு அமைக்கப்பட்டது. குழு, கோவிலை விரிவுபடுத்திக் கட்டுவதற்கும் நிர்வகிப்பதற்கும் தன்னை ஒரு சங்கமாகப் பதிவுசெய்ய ஒருமனதாக முடிவெடுத்து, 1967-இல் முனீஸ்வரன் கோவில் சங்கம் பதிவு செய்யப்பட்டது. கோவில் அமைப்பதற்கான செலவு $7,000 என மதிப்பிடப்பட்டு, உறுப்பினர் சேர்க்கை தொடங்கப்பட்டது. குவீன்ஸ்டவுன் பகுதியில் வசிக்கும் இந்துச் சமூகத்தின் தாராள ஆதரவுடன் கட்டுமானம் 1969-இல் நிறைவடைந்தது. இந்தியாவிலிருந்து பல்வேறு கடவுள் சிலைகள் இறக்குமதி செய்யப்பட்டன. சில பணியாளர்களுடன் செயல்படத் தொடங்கிய ஆலயத்தின் முதல் குடமுழுக்கு 1970-இல் நடைபெற்றது. 

சிங்கப்பூர் அரசாங்கத்தின் தற்காலிகப் பயன்பாட்டு உரிமத்தின்கீழ் இயங்கிய கோவில், 1987-இல், குவீன்ஸ்வே சாலை விரிவாக்கத் திட்டத்திற்கு வழிவிட வேண்டியிருந்தது. அதைத்தொடர்ந்து, வீடமைப்பு வளர்ச்சிக் கழகத்திடமிருந்து மாற்று இடம் 550,000 வெள்ளிக்குக் காமன்வெல்த் டிரைவில் வாங்கப்பட்டது. அங்கு 1995-இல் புதிய ஆலயத்தின் கட்டுமானம் தொடங்கியது. சுமார் மூன்றாண்டு கழித்து, 2,000,000 வெள்ளி செலவில் கட்டப்பட்ட புதிய கோவிலுக்கு, 1998-இல் குடமுழுக்கு செய்யப்பட்டது. அவ்விழாவில் ஏறக்குறைய 6,000 பக்தர்கள் கலந்துகொண்டனர். பல்வேறு வசதிகளைச் சேர்ப்பதற்கும் பெருகிவரும் பக்தர்களின் தேவைகளை முன்னிட்டும், 2004 முதல் 2024 வரை, ஆலயம் பல மறுசீரமைப்புகளைக் கண்டது. ஶ்ரீ முனீஸ்வரன் ஆலயம், 2008 முதல், வசதி குறைந்த தொடக்கப்பள்ளி, உயர்நிலைப்பள்ளி, தொடக்கக்கல்லூரி மாணவர்களுக்கு கல்வி உதவிநிதி வழங்குவதைத் தொடங்கியுள்ளது. மேலும், கோவில் நிர்வாகம், டாப் மார்க்ஸ் மாணவர் பராமரிப்பு நிலையத்தின்மூலம் சுமார் 50 தொடக்கப்பள்ளி மாணவர்களுக்குச் சேவை செய்கிறது.

ஆலயத்தின் குடமுழுக்கு விழா 12 ஜூலை 2024 அன்று நடந்தபோது அதில் கலந்துகொண்ட அதிபர் தர்மன் சண்முகரத்னம், "நீங்கள் இந்துவாக இல்லாவிட்டாலும்கூட, காமன்வெல்த் டிரைவில் உள்ள ஸ்ரீ முனீஸ்வரன் ஆலயம் உருவான கதையை அறிந்துகொள்வது பயன்மிக்கது. நமது மற்ற சில வழிபாட்டுத் தலங்களைப் போலவே, அதன் வேர்களும் ஒரு நூற்றாண்டுக்குமுன் இத்தீவில் குடியேறிய எளிய மனிதர்களிடம் சென்றுசேர்கின்றன. நமது சமய நம்பிக்கைகளுக்கு அப்பாற்பட்டு, நம் வழிபாட்டுத் தலங்களின் தனித்துவமிக்கச் சமூக வரலாறுகளை நாம் அறிந்துகொள்ள வேண்டும். அவ்வரலாறுகள் சிங்கப்பூரர்களாகிய நமது கூட்டு மரபுடைமையின் ஒரு பகுதி." என்றார்.



மேல்விவரங்களுக்கு
“Sri Muneeswaran Temple & Church of the Blessed Sacrament.” Roots.sg. Accessed on 1 August 2025. https://www.roots.gov.sg/places/places-landing/Places/landmarks/my-queenstown-heritage-trail/sri-muneeswaran-temple-church-of-the-blessed-sacrament 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.