சிங்கப்பூர்த் தேசிய ஆவணக் காப்பகம்

சிங்கப்பூர்த் தேசிய ஆவணக் காப்பகம் 1968-இல் நிறுவப்பட்டு, சிங்கப்பூரின் பொதுக் காப்பகங்களின் அதிகாரப்பூர்வப் பொறுப்பாளராகச் செயல்படுகிறது. கடந்த 2013 முதல், இக்காப்பகம் தேசிய நூலக வாரியத்தின் நிர்வாகத்தின்கீழ் உள்ளது. சிங்கப்பூர் தொடர்பான அரசாங்க ஆவணங்களையும் தனியார் ஆவணங்களையும் சேகரித்துப் பாதுகாத்து அவற்றை நிர்வகிப்பது காப்பகத்தின் பொறுப்பு. குறிப்பாக, தேசிய முக்கியத்துவமோ வரலாற்று முக்கியத்துவமோ வாய்ந்த பதிவுகளை அது பாதுகாத்து வருகிறது. சிங்கப்பூர் அரசாங்கத்தின் விவாதங்கள், முடிவுகள், நடவடிக்கைகளை ஆவணப்படுத்துகிறது. மேலும், வரலாற்று முக்கியத்துவமுள்ள வரைபடங்கள், புகைப்படங்கள், வாய்வழி வரலாற்று நேர்காணல்கள், ஒலி, ஒளிப் பதிவுகள் எனப் பல்தரப்பட்ட பதிவுகளையும் சேகரிக்கிறது. 

சிங்கப்பூரின் தமிழ்ப் பண்பாட்டுப் பாரம்பரியத்தைப்பற்றிய நுட்பமான செய்திகளைத் தரக்கூடிய பல ஆவணங்களும் தொகுப்புகளும் இக்காப்பகத்தில் உள்ளன. கலாசாரப் பதக்கம் பெற்ற எழுத்தாளர் ஜே.எம். சாலி, கவிஞர் க.து.மு. இக்பால் ஆகியோரோடும் தமிழ் முரசுவின் நெடுநாளைய ஆசிரியர் வை.தி. அரசு, கர்நாடக இசைக்குழுவின் நிறுவனரும் நடத்துநருமான லலிதா வைத்தியநாதன் உட்பட முக்கியத் தமிழ் ஆளுமைகளோடும் நடத்திய வரலாற்று நேர்காணல்கள் அதன் சேகரிப்புகளில் அடங்கும். கடந்த 2024-ஆம் ஆண்டளவில், காப்பகம் 350 மணி நேரத்திற்கும்மேலான தமிழ் வாய்வழி வரலாற்று நேர்காணல்களைச் சேகரித்துள்ளது. 

மேலும், 1960-களிலிருந்து அரசாங்கத்தின் தமிழ் ஒலி, ஒளிபரப்புச் சேவைகள் படைத்த நிகழ்ச்சிகளைக் காப்பகம் பாதுகாத்து வருகிறது. இதில் பேச்சுகள், செய்திகள், நடப்புவிவகார நிகழ்ச்சிகள் முதலியவற்றோடு, தேர்ந்தெடுக்கப்பட்டத் தகவல், பொழுதுபோக்கு நிகழ்ச்சிகள், நாடகங்கள் ஆகியவையும் அடங்கும். சிங்கப்பூரின் ஒரே தமிழ் உயர்நிலைப் பள்ளியான உமறுப்புலவர் தமிழ் மொழி நிலையத்தின் பதிவுகளையும் காப்பகத்தின் சேகரிப்பில் காணலாம். அதன் பல பதிவுகள் இணையத்தில் கிடைக்கின்றன. தற்போது, காப்பகத்தின் சேகரிப்பில் 20,000 மணி நேரத்திற்கும் மேலான தமிழ் சார்ந்த ஒலி, ஒளிப் பதிவுகள் உள்ளன.



மேல்விவரங்களுக்கு
National Archives of Singapore. (n.d.). Accessed 1 August 2025. https://www.nas.gov.sg/archivesonline/

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.