ஸ்ரீ லயன் சித்தி விநாயகர் கோயில்

ஒரு நூற்றாண்டுப் பழமை வாய்ந்த ஸ்ரீ லயன் சித்தி விநாயகர் கோயில் சைனாடவுன் வட்டாரத்தில் கியோங் செய்க் ரோட்டில் அமைந்துள்ளது. ராணுவக் குடியிருப்புப் பகுதியாக இருந்த சிப்பாய் லைன்ஸ் பகுதியில் அமைந்ததால் ‘லைன்’ சித்தி விநாயகர் கோயில் என அழைக்கப்பட்டுப் பின்னர் அது மருவி ‘லயன்’ சித்தி விநாயகர் கோயில் என்றானது. செட்டியார் கோயில் குழுமத்தால் நிர்வகிக்கப்படும் இரு கோயில்களுள் ஒன்று இது.

சிங்கப்பூர்ப் பொது மருத்துவமனை அமைந்திருக்கும் இடத்தின் அருகில் பொன்னம்பலம் என்பார் ஒரு மரத்தடியில் சிறு கோயிலாக இதைத் தோற்றுவித்தாகக் கூறப்படுகிறது. ஊட்ரம் ரோட்டை ஒட்டியுள்ள பகுதிகளில் வேலை செய்த இந்துக்கள் இங்கு வழிபட்டனர். பின்னர் நாட்டுக்கோட்டைச் செட்டியார் சமூகத்தினர் இதன் நிர்வாகப் பொறுப்பை ஏற்றுக்கொண்டனர். அந்த இடம் 1920-இல் மருத்துவமனை விரிவாக்கத்திற்காக அரசாங்கத்தால் கையகப்படுத்தப்பட்டபோது, தற்போதுள்ள இடத்திற்கு 1925-இல் ஆலயம் இடம் மாற்றப்பட்டு முதல் குடமுழுக்கும் நடத்தப்பட்டது. அப்போது பழைய விநாயகர் சிலையுடன் புதிதாக மற்றொரு விநாயகர் சிலையும் கருவறையில் நிறுவப்பட்டது. அரை நூற்றாண்டுக்குப்பின் ஆலயம் புதுப்பிக்கப்பட்டு 1975-இல் இரண்டாவது குடமுழுக்கு நடத்தப்பட்டது; 1979-இல் கருவறையில் மூன்றாவது விநாயகர் சிலை நிறுவப்பட்டது. தொடர்ந்து, 2007-இல், ஐந்தடுக்கு ராஜகோபுரம், 120 பேர் அமரக்கூடிய திருமண மண்டபம் உள்ளிட்ட விரிவாக்கங்களுடன் 3.5 மில்லியன் வெள்ளிச் செலவில் ஆலயம் புதுப்பிக்கப்பட்டது. பக்தர்களின் சிறப்புப் பூசைகளுக்கும் பிற நிகழ்ச்சிகளுக்கும் இட வசதி ஏற்படுத்தித்தர ஆலயத்திற்குப் பக்கத்தில் ஈரடுக்குக் கட்டடம் ஒன்று 2017-இல் கட்டப்பட்டது. அதன்பின் மேலும் சில ஆலய மேம்பாட்டுப் பணிகள் மேற்கொள்ளப்பட்டு 2019-இல் நடைபெற்ற குடமுழுக்கில் சுமார் 15,000 பேர் கலந்துகொண்டனர். தைப்பூச நாளன்று ஶ்ரீ லயன் சித்தி விநாயகர் கோயிலில் வேல் பூசை செய்யப்பட்டு ஸ்ரீ தெண்டாயுதபாணி கோயிலுக்குக் கொண்டுசெல்லப்படுவது வழக்கமாக இருந்துவருகிறது. இந்துக்கள் மட்டுமின்றி மற்ற சமயத்தவரும் இனத்தவரும் வழிபடும் ஆலயமாக ஶ்ரீ லயன் சித்தி விநாயகர் கோயில் விளங்குகிறது.

மேல்விவரங்களுக்கு
Sri Layan Sithi Vinayagar Temple. “ Accessed on 1 August 2025. https://sttemple.com/about-lsv/
“Sri Layan Sithi Vinayagar Temple.” Roots.sg. Accessed on 1 August 2025. https://www.roots.gov.sg/places/places-landing/Places/surveyed-sites/Sri-Layan-Sithi-Vinayagar-Temple
Goh Yan Han. “Rain Does Not Dampen Fervour of 15,000 Devotees at Hindu Temple Consecration Ceremony.” The Straits Times, 15 December 2019. https://www.straitstimes.com/singapore/rain-does-not-dampen-fervour-of-15000-devotees-at-hindu-temple-consecration-ceremony 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.