சிங்கை நேசன்

சிங்கை நேசன் (1887-1890) வார இதழ், சிங்கப்பூரில் தமிழில் இதழ்கள் ஏதுமற்ற காலக்கட்டத்தில் அத்தேவையை நிரப்பும் நோக்கில் வெளிவரத் தொடங்கியது. செய்திகளையும் கட்டுரைகளையும் பொதுமக்கள் பரவலாகப் படித்துப் புரிந்துகொள்ள ஏதுவாக எளிய மொழிநடையில் வெளியிட்டது. தமிழின் முதல் சிறுகதை சிங்கை நேசனில் வெளிவந்ததா என்ற சர்ச்சை சிங்கை நேசனின் பெயரைத் தமிழ் இலக்கிய உலகில் பிரபலமாக்கியது.

சிங்கை நேசன் திங்கட்கிழமைதோறும், நான்கு பக்க அளவில், ஒவ்வொரு பக்கத்திலும் நான்கு பத்திகளைக் கொண்ட வடிவமைப்பில் வெளிவந்தது. அதன் ஆசிரியராகவும் வெளியீட்டாளராகவும் பணியாற்றிய சி.கு. மகுதூம் சாயபு, தம் தீனோதய வேந்திரசாலையில் இதழை அச்சிட்டு வெளியிட்டார். சுமார் மூன்றாண்டுகளில் மொத்தம் 151 இதழ்கள் வெளிவந்தன. ஒவ்வோரிதழும் சுமார் 350 படிகள் விற்பனையாயின. கட்டுரை, தலையங்கம், நூலறிமுகம், விளம்பரங்கள், சிங்கப்பூர்ச் செய்திகள், இந்தியச் செய்திகள், இலங்கைச் செய்திகள், உலகச் செய்திகள், சமாச்சாரத் திரட்டு, கடிதம் எனப் பல்வேறு அம்சங்களைக்கொண்ட இதழாகச் சிங்கை நேசன் இருந்தது. கையொப்பக்காரர்கள் என்று அழைக்கப்பட்ட முன்பதிவுச் சந்தாதாரர்கள் ஒப்புக்கொண்டபடி பணம் செலுத்தாததால் நிலுவைத்தொகை அதிகரித்து 1890-இல் இதழ் நின்றுபோனது.

ஆய்வாளர் நா. கோவிந்தசாமி தமிழின் முதல் சிறுகதை சிங்கை நேசனில் எழுதப்பட்டுவிட்டதாக ஒரு கருத்தை 1990-களில் முன்வைத்தார். அக்கருத்து சர்ச்சையை உருவாக்கியதால் சிங்கை நேசனின் பெயர் தமிழ் இலக்கிய உலகில் பிரபலமானது. சிங்கப்பூரில் 19-ஆம் நூற்றாண்டுத் தமிழரின் வாழ்வாதாரம், சுகாதாரம், பொழுதுபோக்கு, போக்குவரவு உள்ளிட்ட பல்வேறு அம்சங்களைப் பதிவுசெய்த சமகாலத் தரவான சிங்கை நேசன் ஆய்வாளர்களுக்கு ஒரு பொக்கிஷமாகத் திகழ்கிறது. சிங்கை நேசனின் அனைத்து இதழ்களையும் மின்னிலக்க வடிவில் தேசிய நூலக வாரியத்தின் NewspaperSG தளத்தில் வாசிக்கலாம்.



மேல்விவரங்களுக்கு
Badariah Binte Abdul Lathif. Sahib’s Singai Nesan (1887–1890): A Tamil Voice in 19th Century Colonial Singapore. Bachelor’s thesis, Department of History, National University of Singapore, 2015–2016. Unpublished
திருமுருகானந்தம், கோட்டி. சிங்கப்பூர் இதழியல் வரலாறு. சென்னை: பாஸ் ஃபவுண்டேஷன், 2019
திருமுருகானந்தம், கோட்டி, சி. கு. மகுதூம் சாயபுவும் சிங்கை நேசனும் - ஓர் ஆய்வு. சென்னை: சமூக வளர்ச்சி மற்றும் ஆராய்ச்சி நிறுவனம், 2015, 15-16 (Call no. RSING Tamil 079.5957 THI)
சிவானந்தம் நீலகண்டன். சிங்கைத் தமிழ்ச் சமூகம் வரலாறும் புனைவும். காலச்சுவடு பதிப்பகம், 2019

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.