எட்வின் தம்பு

எட்வின் நடேசன் தம்பு (பி. 1933) கவிஞர், கல்வியாளர், சிங்கப்பூர் ஆங்கில இலக்கிய உலகின்  ஆஸ்தானக் கவிஞர் எனுமளவிற்குப் பரவலாகக் பாராட்டப்படுபவர். சிங்கப்பூரில் தமிழ்-தியோச்சு தம்பதியருக்குப் பிறந்த தம்பு, விக்டோரியா பள்ளியிலும் மலாயாப் பல்கலைக்கழகத்திலும் பயின்றார். அவர் 1956-இல் ஆங்கிலத்துறையில் பட்டம் பெற்றார். பட்டப்படிப்புக்குப்பிறகு, சுமார் ஒன்பது ஆண்டுகள் அரசாங்கப் பொதுச் சேவையில் பணியாற்றினார். அதனையடுத்து, சிங்கப்பூர்ப் பல்கலைக்கழகத்தில் (சிங்கப்பூர் சுதந்திரம் பெற்றதையொட்டிப் பெயர்மாற்றம் கண்ட மலாயாப் பல்கலைக் கழகம்) 1970-இல் ஆப்பிரிக்கக் கவிதை ஆய்வில் அவர் முனைவர் பட்டம் பெற்றார். பின்னர், 1977-க்கும் 1993-க்கும் இடைப்பட்ட காலத்தில், ஆங்கில மொழி, இலக்கியத் துறையில் பேராசிரியராகப் பதவி உயர்வு பெற்றதோடு, துறைத் தலைவராகவும் பணியாற்றினார். சிங்கப்பூர்ப் பல்கலைக்கழகமும் நன்யாங் பல்கலைக்கழகமும் 1980-இல் ஒன்றிணைந்து சிங்கப்பூர்த் தேசிய பல்கலைக்கழகமான பிறகு, 1980-இலிருந்து 1991 வரை அவர், கலை, சமூக அறிவியல் புலத்தலைவராகப் பதவிவகித்தார். மேலும், 1993-இலிருந்து 2005 வரை, பல்கலைக்கழகக் கலை மையத்தின் முதல் தலைவராகவும் இயக்குநராகவும் பணியாற்றினார். முழுநேர ஆசிரியராக இருந்த தம்பு, 1997-இல் ஓய்வு பெற்ற பின்னர், மதிப்புறு பேராசிரியராகப் பல்கலைக்கழகத்தில் தொடர்ந்து  கல்விச் சேவையாற்றி வருகிறார்.

தம்பு, 1949-இல்,  விக்டோரியா பள்ளி நாட்களில் தமது முதல் கவிதையான ”கேலோங்”கை எழுதினார். மலாயாப் பல்கலைக்கழகத்தில், பல்கலைக்கழக சோசலிஸ்ட் கிளப் வெளியிட்ட ஃபாஜார் என்ற பத்திரிகையின் ஆசிரியர் குழுவில் பணியாற்றினார். அவர், சிங்கப்பூர், மலேசியாவின் சில ஆரம்பக்கால ஆங்கிலக் கவிதைகள், புனைகதைகளைத் தொகுத்தளித்த அவர் தம் சொந்த எழுத்துகளையும் பதிப்பிக்கலானார். தம்பு 1950-களில் தொடங்கி வெளியிட்ட கவிதைத் தொகுப்புகளில் பல பரிசுகளையும் பாராட்டுகளையும் பெற்றுள்ளன. குறிப்பாக, 2018-இல் வெளியிடப்பட்ட ஏ காதரிங் ஆஃப் தீம்ஸ் என்ற தொகுப்பு, சிங்கப்பூர் இலக்கியப் பரிசு இறுதிப் பட்டியலில் இடம்பெற்றது. அவர்தம் கவிதைகளின் தொகுப்பான தி பான்யன், பேராசிரியர் சித்ரா சங்கரனால் ஆலம் என்னும் தலைப்பில் தமிழ் மொழிபெயர்ப்பாகத் தொகுக்கப்பட்டது.

தம்பு, சிங்கப்பூர் புத்தக மன்றத்தின் கவிதை விருதை மூன்று முறையும், (1978, 1980, 1994) தென்கிழக்காசிய எழுத்து விருது (1979), இலக்கியத்துக்கான முதல் கலாசாரப் பதக்கம் (1979), ராஜா ராவ் விருது (2002) உட்பட பல பெரும் இலக்கிய விருதுகளையும் பெற்றவர். அவருடைய பொதுச் சேவைக்காக உயரிய அரசாங்க விருதுகளும் பெற்றிருக்கின்றார். தேசியப் பல்கலைக்கழகம், அவருக்கு மதிப்புறு மாணவர் விருதை வழங்கியதோடு, அவர் நினைவாக, புகுமுக வகுப்பு மாணவர்களின் மிகச்சிறந்த ஆங்கில இலக்கியப் படைப்புகளுக்காக, எட்வின் தம்பு பரிசை 2019-இலிருந்து ஆண்டுதோறும் அளித்து வருகிறது.

நிலாஞ்சனா சென்குப்தா, 2021-இல் வெளியிட்ட தி வோட்டிவ் பென்: ரைட்டிங்ஸ் ஆன் எட்வின் தம்பு என்னும் நூல்வழி அவர் வாழ்க்கை வரலாற்றை அறியலாம். சிங்கப்பூரின் ஆங்கில இலக்கியப் பரப்பை வடிவமைத்திருக்கிறது என்று சொல்லக்கூடிய அளவுக்கு அவர் செல்வாக்கு ஐம்பது ஆண்டுகளுக்கும் மேலாக நீடித்துள்ளது. சிங்கப்பூர்க் கவிஞரும் கல்வியாளருமான கிர்பால் சிங்கின் கூற்றுப்படி, "எட்வின் தம்பு கவிஞர் மட்டுமல்லர், ஒரு கலாசாரச் சின்னம்."

மேல்விவரங்களுக்கு
Poetry.SG. “Edwin Thumboo (b.1933),” n.d. https://www.poetry.sg/edwin-thumboo-bio
NUS News. “NUS establishes new literary prize in honour of Singapore’s prominent poet Edwin Thumboo,” April 23, 2019. https://news.nus.edu.sg/nus-establishes-new-literary-prize-in-honour-of-singapores-prominent-poet-edwin-thumboo/
Ho, Olivia. “New Biography Maps the Many Worlds of Poet Edwin Thumboo.” The Straits Times, February 20, 2021. https://www.straitstimes.com/life/arts/new-biography-maps-the-many-worlds-of-poet-edwin-thumboo
Esplanade. “Edwin Thumboo.” Esplanade Offstage, October 22, 2019. https://www.esplanade.com/offstage/arts/edwin-thumboo

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.