ஸ்ரீ சிவன் கோயில்

கேலாங் ஈஸ்ட் பகுதியிலுள்ள ஸ்ரீ சிவன் கோயில் 150 ஆண்டுகளுக்கும் மேற்பட்ட வரலாற்றைக் கொண்டது. இந்து அறக்கட்டளை வாரியத்தால் நிர்வகிக்கப்படும் நான்கு கோயில்களில் ஒன்று.

தற்போது டோபி காட் பெருவிரைவு ரயில் நிலையம் அமைந்துள்ள ஆர்ச்சர்ட் ரோடு பகுதியில், 1850-களின் முற்பகுதியில், ஸ்ரீ சிவன் கோயில் கட்டப்பட்டிருந்ததற்கான பதிவுகள் உள்ளன. அவ்விடத்தில் சிவலிங்கம் ஒன்று 1850-ஆம் ஆண்டுக்கு முன்பே இருந்ததாகவும் தெரிகிறது.

ஸ்ரீ சிவன் கோயில், 1915-இல், முகமதிய, இந்து அறக்கட்டளை வாரியத்தின்கீழ் கொண்டுவரப்பட்டது. இரண்டாம் உலகப் போரின் போது, கோயிலின் சில சிலைகளும் சில பகுதிகளும் குண்டுகளால் சேதமடைந்தன. போரின் முடிவில் மறுசீரமைப்புப் பணிகள் மேற்கொள்ளப்பட்டு 1943-இல் குடமுழுக்கு நடைபெற்றது.

ஆர்ச்சர்ட் ரோட்டை விரிவுபடுத்தும் திட்டத்திற்காகச் சிறிது நிலத்தை விட்டுக்கொடுத்த கோயில் அதற்கான இழப்பீட்டைப் பெற்று, 1962-இல் மீண்டும் மறுசீரமைப்புகளை முடித்து, 1964-இல் அடுத்த குடமுழுக்கு நடைபெற்றது. பெருவிரைவு ரயில் நிலையம், 1983-இல், கோயில் அமைந்திருந்த தரைத்தளத்துக்குக் கீழே கட்டப்பட்டதால், தற்காலிகமாகச் சிராங்கூன் ரோட்டில் ஸ்ரீ ஸ்ரீநிவாசப் பெருமாள் கோயிலுக்கு அருகில் அமைக்கப்பட்ட தற்காலிகக் கோவிலில் அனைத்துச் சிலைகளும் இடமாற்றம் செய்யப்பட்டு அன்றாட வழிபாடுகளும் வழக்கமான திருவிழாக்களும் தொடர்ந்தன.

ஶ்ரீ சிவன் கோயிலுக்குப் புதிய நிரந்தரக் கட்டடத்தை அமைக்கும் பொருட்டுக் கோயிலை நிர்வகிக்கும் இந்து அறக்கட்டளை வாரியம், இந்தியாவில் உள்ள புகழ்பெற்ற கோயில் கட்டடக் கலைஞர்களிடம் ஆலோசனை பெற்று, தனித்துவமிக்க எண்கோண வடிவமைப்புடன் புதிய கோயிலை கேலாங் ஈஸ்ட்டில் அமைத்தது. புதிய ஆலயம் 3,000 சதுர மீட்டர் பரப்பளவில் ஆறு மில்லியன் வெள்ளி செலவில் கட்டப்பட்டது. இது முந்தைய ஆர்ச்சர்ட் ரோடு ஆலயப் பரப்பைக் காட்டிலும் நான்கரை மடங்குப் பெரியது. சிராங்கூன் ரோட்டில் தற்காலிக இடத்தில் பத்து ஆண்டுகளுக்கு நீடித்த ஸ்ரீ சிவன் கோயில் அதன் தற்போதைய அமைவிடத்தில் 1993-இல் நிறுவப்பட்டது. கோயிலில் கொண்டாடப்படும் முக்கியத் திருவிழாக்களில் மகா சிவராத்திரி, குரு பெயர்ச்சி ஆகியவையும் அடங்கும்.

ஸ்ரீ சிவன் கோயில் சிங்கப்பூர் இந்துக்கள் மத்தியில் ஆத்ம சாந்திச் சடங்குகளுக்காக நன்கு அறியப்பட்டது. இறந்த பிறகு முதல் மாதத்திற்குள் செய்யப்படும் பல கட்டச் சடங்குகள், வருடாந்திர நினைவுச் சடங்கு உள்ளிட்ட பல்வேறு சடங்குகள் கோவிலில் நடைபெறுகின்றன.



மேல்விவரங்களுக்கு
“Sri Sivan Temple.” Hindu Endowments Board. Accessed 1 August 2025. https://heb.org.sg/sst/
“Temple History.” Sri Sivan Temple. Accessed 1 August 2025. https://sst.org.sg/HEB/Template3/temple-history

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.