பொய்கை நற்பணி மன்றம்

பொய்கை நற்பணி மன்றம், தமிழகத்தில், நாகப்பட்டினம் துறைமுகத்திற்கு அருகிலுள்ள வடக்குப்  பொய்கைநல்லூர் கிராமத்திலிருந்து சிங்கப்பூருக்குக் குடியேறியவர்களின் சந்ததியினரால் உருவாக்கப்பட்டது. இளம் தலைமுறையினர் சிங்கையில் தங்களது அடையாளங்களைக் காக்கவும் தங்களது வேர்களை மறக்காமல் இருக்கவும் உதவுவதே மன்றத்தின் முக்கிய நோக்கம். சொ. தங்கவேல் தலைமையில் 11 செயற்குழு உறுப்பினர்களுடன் 2014-இல் தொடங்கப்பட்ட இம்மன்றத்தில் தற்போது 100 உறுப்பினர்களுக்குமேல் உள்ளனர்.

நாகைத் துறைமுகம் அருகிலேயே இருந்ததால், 18-ஆம் நூற்றாண்டிலிருந்தே, பொய்கையைச் சேர்ந்தவர்கள், கப்பல்மூலம் சிங்கப்பூருக்கு வரத்தொடங்கினர். மேலும், கடலோடும் கலங்களைப் பழுதுபார்க்கும் கலப்பத்துக்காரர்களாக இருந்ததால், சிங்கப்பூரிலும் அந்தத் தொழிலிலேயே முதலில் ஈடுபட்டனர். காலனித்துவகாலச் சிங்கப்பூரில் கடல்சார் வணிகம் 18, 19-ஆம் நூற்றாண்டுகளில் செழித்து வளர்ந்ததால் கலப்பத்துக்காரர்களுக்குத் தேவை அதிகமிருந்தது. முதலில் குடியேறிய பொய்கைவாசிகள் சவுத் பிரிட்ஜ் ரோடு அருகில் ‘பால் கம்பம்’ என்று அழைக்கப்பட்ட பகுதியில் குடியேறி வசித்தனர். பின்னாளில் கலப்பத்துத் தொழிலுக்கப்பால் வேறுபல துறைகளிலும் வேலைசெய்யத் தொடங்கிப் பல இடங்களிலும் பரவி வாழ்ந்தனர். தற்போது, பொய்கையைச் சேர்ந்த சுமார் 70 குடும்பங்கள் சிங்கப்பூரில் வசித்து வருகின்றன. 

சவுத்பிரிட்ஜ் ரோட்டிலுள்ள ஸ்ரீ மாரியம்மன் கோயில் எழுந்த காலம் முதலே பொய்கைநல்லூர் பூர்விகக் குடிகளுடன் அக்கோவிலுக்கு நெருக்கமான தொடர்பு இருந்து வருகிறது. கோவிலின் தீமிதித் திருவிழாவைத் தொடங்கியதிலும் தொடர்ந்து நடத்தியதிலும் இவர்களுக்கு முக்கியப் பங்கு உண்டு என்று கூறப்படுகிறது. ஆராதனைகளின்போது அவர்களின் பேராளர்களுக்கு முதல் காளாஞ்சி கொடுக்கப்பட்டுத் தனி மரியாதை செலுத்தப்பட்டு வந்தது. இம்மன்றம் ஒவ்வோராண்டும், ஸ்ரீ மாரியம்மன் ஆலயக் கூட்டு வழிபாடு, தீபாவளிக் கலைநிகழ்ச்சி, நடைப்பயிற்சி, வெளிப்புற விருந்துலா எனப்பல ஒன்றுகூடல் நிகழ்ச்சிகளை நடத்திவருகிறது. மேலும் பூர்விகக் கிராமத்தில் ஏற்படும் இயற்கைப் பேரிடர்களுக்கும் இறைப்பணிக்கும் பொருளுதவி செய்துவருகிறது. 



To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.