முனாஜாத்துத் திரட்டு

முனாஜாத்துத் திரட்டு இதுவரை கிடைத்திருக்கும் சிங்கப்பூர்த் தமிழ் வெளியீடுகளில் ஆகப் பழமையானது. இந்தியாவின் நாகூரைச் சேர்ந்த நா.மு. முகம்மது அப்துல்காதிறுப் புலவர் நூலின் ஆசிரியர். சிங்கப்பூர் அரசாங்க அச்சக சார்பில் ஜே. பேட்டன் என்பார் 1872-இல் அச்சிட்டுக் கொடுத்த அந்நூல், இஸ்லாமிய ஆன்மிகத்தைத் தமிழ் இலக்கியக் கட்டமைப்பில் படைத்த முக்கியமான கவிதைத் தொகுப்பாகக் கருதப்படுகிறது.

‘முனாஜாத்’ என்றால் அறபு மொழியில் கடவுளுடன் உரையாடுவது என்று பொருள். முனாஜாத்துத் திரட்டு 105 பக்கங்களில் 55 பாடல்களைக் கொண்டுள்ளது. அவை அனைத்தும் நபி முகமது, பிற முக்கிய ஆன்மிகத் தலைவர்கள், அவுலியாக்கள் எனப்படும் இறையன்பர்கள் ஆகியோரைப் போற்றும் வகையில் அமைந்துள்ளன. தமிழ்ச் சமூகத்தின் சமய நம்பிக்கைகள், தனிப்பாக்கள், தனிப்பதங்கள், சித்திரகவிகள் உள்ளிட்ட இலக்கிய வடிவங்கள், மூதாதையத் தொடர்புகள் ஆகியவற்றையும் நூலில் காணலாம். அந்நூல், சிங்கப்பூரின் இஸ்லாமிய இலக்கியப் பாரம்பரியத்தில் மட்டுமன்றித் தமிழ் இலக்கிய வரலாற்றிலும் குறிப்பிடத்தக்க இடத்தைப் பிடித்துள்ளது.

முனாஜாத்துத் திரட்டு அச்சு வடிவிலும் நுண்படச்சுருள் வடிவத்திலும் தேசிய நூலக வாரியத்தில் பாதுகாக்கப்பட்டுள்ளது. அத்துடன், மின்னிலக்க வடிவத்திலும் அந்நூலைப் பொதுமக்கள் எளிதாகப் படிக்கமுடியும்.

அப்துல்காதிறுப் புலவர் சிங்கை நேசன் வார இதழின் ஆசிரியர் சி.கு. மகுதூம் சாயபுவுடன் இணைந்து சிங்கப்பூரின் முதல் தமிழ்ப் பத்திரிகையாகக் கருதப்படும் சிங்கை வர்த்தமானியையும் நடத்தியவர் என்பது குறிப்பிடத்தக்கது.



மேல்விவரங்களுக்கு
“Indian Muslim Devotional Poems.” BiblioAsia 11, no. 4 (Jan–Mar 2016), 31 January 2016. https://biblioasia.nlb.gov.sg/vol-11/issue-4/jan-mar-2016/indian-muslim-devotional-poems-munajathu-thirattu/.
கூர் முகம்மது அப்துல் காதிறுப் புலவர். முனாஜாத்துத் திரட்டு. Singapore: J. Paton Government Printer and National Library Board, 1872. (Call no.: RRARE 894.81114 MUH) 

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.