சண்முகம், கா.

கா. சண்முகம் (பி. 1959) அமைச்சரவையின் மூத்த உறுப்பினர். தற்போது தேசியப் பாதுகாப்பு ஒருங்கிணைப்பு அமைச்சராகவும் உள்துறை அமைச்சராகவும் பணியாற்றி வருகிறார். நாடாளுமன்ற உறுப்பினராக 1988-இல் தம் அரசியல் வாழ்வைத் தொடங்கிய அவர், 2008-ஆம் ஆண்டிலிருந்து அமைச்சராகப் பதவி வகித்து வருகிறார். சிங்கப்பூரில் பிறந்த சண்முகம், நியூட்டன் ஆண்கள் பள்ளியிலும் ராஃபிள்ஸ் கல்வி நிலையத்திலும் படித்தார். பின்னர் சிங்கப்பூர் தேசியப் பல்கலைக்கழகத்தில் சட்டம் பயின்று, 1984-இல் இளநிலைப் பட்டம் (சிறப்புத் தகுதி) பெற்று தம் வகுப்பில் முதல் மாணவராகத் தேர்ச்சியடைந்தார். அவர் 1985-இல் சிங்கப்பூரில் வழக்கறிஞராகத் தொழில்புரியத் தகுதி பெற்றார். ஆலன் & க்ளெட்ஹில் நிறுவனத்தில் வழக்கறிஞராகச் சேர்ந்த அவர் இறுதியில் அதன் மூத்த பங்குதாரராகவும் வழக்காடல், சச்சரவுத் தீர்வுத் துறைத் தலைவராகவும் ஆனார். வெற்றிகரமான வழக்கறிஞராகத் திகழ்ந்த அவர், பல்வேறு பன்னாட்டுச் சட்ட இதழ்களில் ஆசியாவின் சிறந்த வழக்காடல், தீர்ப்பாய, நொடிப்பு வழக்கறிஞர்களில் ஒருவராகத் தொடர்ந்து அங்கீகரிக்கப்பட்டார். அவர் கையாண்ட 100-க்கும் மேற்பட்ட வழக்குகள் சட்ட அறிக்கைகளில் இடம்பெற்றுள்ளன. சண்முகம், 1998-இல், தமது 38-ஆவது வயதில், மிக இளம் வயதிலேயே நியமிக்கப்பட்ட மூத்த வழக்கறிஞர்களில் ஒருவரானார். 

அவர் வழக்கறிஞராகப் பணியாற்றிய காலத்திலேயே அவரது அரசியல் வாழ்க்கை தொடங்கியது. மக்கள் செயல் கட்சி, 1988 பொதுத் தேர்தலில் செம்பவாங் குழுத்தொகுதியில் வெற்றி பெற்றபோது அந்த அணியில் ஒருவராக இடம் பெற்றிருந்த சண்முகம், சொங் பாங் பிரிவுக்கான நாடாளுமன்ற உறுப்பினரானார். அவர், 2008-இல் சட்ட அமைச்சராகவும், இரண்டாம் உள்துறை அமைச்சராகவும் அமைச்சரவையில் இணைந்தபோது சட்டத் தொழிலிலிருந்து விலகினார். அதன் பின்னர், 2011 முதல் 2015 வரை வெளியுறவு அமைச்சராக இருந்த காலத்தைத் தவிர, அவர் பெரும்பாலும் சட்ட அமைச்சராகவும் உள்துறை அமைச்சராகவும் பதவி வகித்து வந்துள்ளார். கடந்த 2025 பொதுத் தேர்தலுக்குப் பின்னர், தேசியப் பாதுகாப்பு ஒருங்கிணைப்பு அமைச்சராகவும் உள்துறை அமைச்சராகவும் நியமிக்கப்பட்டார். 

சண்முகம் தாம் பணியாற்றிய அமைச்சுகளில் பற்பல கொள்கை மாற்றங்களிலும் புத்தாக்கங்களிலும் முக்கியப் பங்காற்றியுள்ளார். மேலும், சிங்கப்பூரில் போதைப்பொருள் கடத்தலுக்கு எதிராகக் கடுமையான நிலைப்பாடு கொண்டுள்ளவர் என்று வெளிநாடுகளில் அவரைத் தெரியும். பெண்கள், குழந்தைகள் போன்ற எளிதில் பாதிக்கப்படக்கூடியவர்களின் பாதுகாப்பை வலுப்படுத்துவதற்கான கொள்கை முன்னெடுப்புகளுக்காகவும் அவர் பெயர்பெற்றவர். மேலும், விலங்குகளைத் துன்புறுத்துவோருக்கெதிரான சட்டங்களை அறிமுகப்படுத்தியதோடு, விலங்கு நலக் குழுக்களின் ஆதரவாளராகவும் விளங்குகிறார். 

சிண்டா அறங்காவலர் குழுவின் தலைவராக இருந்த தர்மன் சண்முகரத்தினம் அதிபரானதும், 2023-இல், சண்முகம் தலைவராக நியமிக்கப்பட்டார். முன்னர், 1991 முதல் 2002 வரை, அவர் அமைப்பின் ஆலோசகராகப் பணியாற்றினார்; 2002 முதல் 2009 வரை செயற்குழுவின் தலைவராக நியமிக்கப்பட்டார்; 2010 முதல் அதன் ஆயுள் அறங்காவலராக இருக்கிறார். பொருளாதார மந்தநிலை, 2003-இல் சார்ஸ் நோய்ப் பரவல் போன்ற சவால்மிக்க காலங்களில் சண்முகம் சிண்டாவின் செயற்குழுத் தலைவராகப் பணியாற்றினார். அந்த நேரத்தில் 2,000 இந்தியச் சிங்கப்பூரர்கள் பயனடைந்த தொழில் வாய்ப்புகள், பயிற்சி போன்ற பல முக்கியத் திட்டங்கள் அவரது தலைமையில் தொடங்கப்பட்டன. மாணவர்களுக்கும் அவர்களது குடும்பங்களுக்கும் முழுமையான ஆதரவை வழங்கச் சிண்டா மேற்கொண்ட முயற்சிகளின் ஒரு பகுதியாக, பின்தங்கிய மாணவர்களுக்கு நிதியுதவி வழங்குவதற்காக, 2008-இல் தொடங்கப்பட்ட ‘பள்ளிக்குத் திரும்புதல்’ விழா சண்முகத்தின் தலைமையில் உருவான மற்றொரு திட்டம். 




மேல்விவரங்களுக்கு
“Mr K Shanmugam.” Parliament of Singapore. Accessed on 1 August 2025. https://www.parliament.gov.sg/mps/list-of-current-mps/mp/details/k-shanmugam
“Mr K Shanmugam.” Prime Minister’s Office Singapore. Accessed on 1 August 2025. https://www.pmo.gov.sg/cabinet/mr-k-shanmugam
Sumiko Tan. “Lunch With Sumiko: I do it as long as it's the right thing to do, says Shanmugam.” The Straits Times, 16 June 2019. https://www.straitstimes.com/singapore/i-do-it-as-long-as-its-the-right-thing-to-do

To read in English 

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.