ஸ்ரீ சிவ-கிருஷ்ண ஆலயம்

ஸ்ரீ சிவ-கிருஷ்ண ஆலயம் முதலில் செம்பவாங்கில் பி. குஞ்சுகிருஷ்ணன் என்பவரால் 1962-இல் நிறுவப்பட்டது. இந்தக் கோயிலில் சிவன், கிருஷ்ணன் இருவரும் இணைந்த ஒரு தனிச்சிறப்பு வாய்ந்த தெய்வச்சிலை உள்ளது. குஞ்சுகிருஷ்ணன் ஒரு வெற்றிடத்தைச் சீர்செய்து கொட்டகை கட்டி அதில் ஒரு சன்னதியை அமைத்தார். பக்தர்களின் எண்ணிக்கை அதிகரித்தபோது அக்கோயிலை நிர்வகிக்க ஒரு குழு அமைக்கப்பட்டது. அக்குழு ஸ்ரீ சிவ-கிருஷ்ண ஆலயம் என்று கோயிலுக்குப் பெயரிட்டு அதனைப் பராமரித்தது.

ஆலயம் இருந்த இடம் அரசின் மறுமேம்பாட்டுத் திட்டங்களுக்குத் தேவைப்பட்டபோது, அது 1982-இல் மார்சிலிங் ரைஸில் உள்ள அதன் தற்போதைய இடத்திற்கு மாற்றப்பட்டு ஒரு தற்காலிகக் கூடத்தில் அமைக்கப்பட்டது. ஆறுமுகம் சிவலிங்கம் என்பாரின் தலைமையிலான குழு 1986-இல் கோவிலை முறையாகக் கட்டுவதற்கான முயற்சிகளைத் தொடங்கியது. அடுத்த ஆண்டே அடிக்கல் நாட்டு விழா நடத்தி, 1996-இல் கோயில் கட்டி முடிக்கப்பட்டுக் குடமுழுக்கு நடத்தப்பட்டது.

பின்னர் 2022-இல், 250 இருக்கைகள் கொண்ட பல்நோக்கு மண்டபம், பொது வகுப்பறைகள், நடன அறை, கூரைத் தளம் ஆகியவற்றை உள்ளடக்கிய நான்கு மாடிக் கட்டடம் திறக்கப்பட்டது. அனைத்து இன, சமய மக்களும் இந்த வசதிகளைப் பயன்படுத்துகின்றனர். கோயில் ஆண்டுதோறும் உட்லண்ட்ஸைச் சுற்றியுள்ள பக்தர்களுக்கு அருள்பாலிக்க சிவ-கிருஷ்ணர் சிலையைத் தேரில் அமர்த்தி ஊர்வலம் நடத்துகிறது.

ஏறத்தாழ இரண்டு மில்லியன் வெள்ளி செலவிலான ஆலயத்தின் புதுப்பிப்புப் பணிகள் ஜனவரி 2024-இல் தொடங்கப்பட்டு, ஓராண்டு கழித்து, பிப்ரவரி 2025-இல் குடமுழுக்கு நடந்தது. சுமார் 10,000 பக்தர்கள் பங்கேற்ற நிகழ்வில் சிறப்பு விருந்தினராகப் பிரதமர் லாரன்ஸ் வோங் கலந்துகொண்டார். 



மேல்விவரங்களுக்கு
“Sri Siva Krishna Temple.” Roots.sg. Accessed on 1 August 2025. https://www.roots.gov.sg/places/places-landing/Places/landmarks/Communities-of-Woodlands/Sri-Siva-Krishna-Temple. 
Lau, Jean. “Hindu temple in Marsiling welcomes public to use space at its new annex.” The Straits Times, 27 February 2022. 
“History of the Temple.” Sri Siva Krishna Temple. Accessed on 1 August 2025. 
Yeo, Mike. “PM Wong joins 10,000 Hindu devotees at temple consecration ceremony in Marsiling.” The Straits Times, 9 February 2025. https://str.sg/h5gw. 

To read in English 

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.