ஜே.எம். சாலி

ஜே.எம். சாலி (பி.1939) என அழைக்கப்படும் ஜமாலுதீன் முகம்மது சாலி, இதழியல், ஒளி, ஒலிபரப்பு, மொழிபெயர்ப்பு, படைப்பிலக்கியம் ஆகிய துறைகளில் சுமார் 60 ஆண்டுகள் பணியாற்றியவர். ஐம்பதுக்கும் மேற்பட்ட நூல்களை எழுதியவர், கலாசாரப் பதக்க விருதாளர். இந்தியாவின் எரவாஞ்சேரியில் பிறந்த சாலிக்கு, இளவயதிலிருந்தே எழுத்தார்வம் அதிகமிருந்தது. ‘தேர்தல்’ என்ற சிறுகதையை 1955-இல் கண்ணன் சிறுவர் இதழில் எழுதினார். அவர் இளநிலை பட்டப்படிப்பு படித்தபோது, அதே இதழில், அவருடைய இரு கண்கள் என்ற சிறார் நாவல் 1959-இல் வெளிவந்தது. பிறகு சென்னை மாநிலக் கல்லூரியில் முதுநிலை பட்டப் படிப்பை முடித்ததும் தமிழ் முரசு நாளிதழில் பணியாற்ற கோ. சாரங்கபாணியால் அழைக்கப்பட்டு 1964-இல் சிங்கப்பூருக்கு வந்தார். தமிழ்முரசில் 1964 முதல் 1971 வரை உதவி ஆசிரியராகப் பணியாற்றினார். 

பின்னர் தமிழகம் திரும்பி 1981 வரை ஆனந்த விகடன் வார இதழின் உதவி ஆசிரியராகவும் பிறகு சுமார் ஓராண்டுக்கு மயன் என்ற இளைஞர் இதழின் பொறுப்பாசிரியராகவும் வேலைபார்த்தபின், 1983இல் மீண்டும் தமிழ் முரசில் உதவி ஆசிரியராகப் பொறுப்பேற்றார். அவ்வாண்டிலேயே அங்கிருந்து விலகி, சிங்கப்பூர் ஒலிபரப்புக் கழகத்தில் செய்தி ஆசிரியராகச் சேர்ந்தவர், 17 ஆண்டுகள் பணிபுரிந்து 2000-இல் ஓய்வுபெற்றார். இக்காலக்கட்டத்தில் கலாசார அமைச்சின் இலக்கிய இதழான சிங்கா ஆலோசனைக் குழுவில் மூன்றாண்டுகள் பணியாற்றினார். ஓய்வுபெற்றபின், 2012 வரை பகுதிநேர மொழிபெயர்ப்பு ஆசிரியராக அரசாங்கச் சேவைப் பயிற்சிக் கழகத்திலும் பகுதிநேர உரைபெயர்ப்பாளராக லஞ்ச ஊழல் புலனாய்வுப் பிரிவிலும் பணியாற்றினார். சிங்கப்பூர் இஸ்லாமிய சமூக மன்றத்தின் வெளியீடான நாடி இதழின் ஆசிரியர் குழு உறுப்பினராக 2004 முதல் 2012 வரை பங்காற்றினார். இப்பணிகளுக்கிடையே தொடர்ந்து சிறுகதைகள், நாவல்கள், நாடகங்கள், கட்டுரைகளை எழுதித் தொகுப்புகளாக வெளியிட்டார். அரைநூற்றாண்டுக்கும் மேற்பட்ட இலக்கியப் பயணத்தில், அலைகள் பேசுகின்றன (1975), வெள்ளைக் கோடுகள் (1994), ஆயுள் தண்டனை (2007) ஆகிய நாவல்கள் உள்ளிட்ட 50-க்கும் மேற்பட்ட இலக்கியப் படைப்புகளை வெளியிட்ட ஜே.எம். சாலி பல்வேறு விருதுகள் அளிக்கப்பட்டு கௌரவிக்கப்பட்டார். அவற்றுள் சிங்கப்பூரின் ஆக உயரிய கலை, இலக்கிய விருதான கலாசாரப் பதக்கமும் (2012) தென்கிழக்காசிய எழுத்து விருதும் (2015) அடங்கும். இவருடைய சில படைப்புகள் சிங்கப்பூரிலும் வெளிநாடுகளிலும் பல்வேறு கல்விநிறுவனங்களின் பாடத்திட்டத்தில் வைக்கப்பட்டுள்ளன.

மேல்விவரங்களுக்கு
Lee, Jian Xuan. “Tamil writer-translator J.M> Sali wins 2015 S.E.A Write Award for Singapore,” The Straits Times, 11 December, 2015. https://www.straitstimes.com/lifestyle/arts/tamil-writer-translator-jm-sali-wins-2015-sea-write-award-for-singapore 
” J.M. Sali.” Off Stage, 12 October 2016. https://www.esplanade.com/offstage/arts/j-m-sali
Koh, Tommy, Timothy Auger and Jimmy Yap. Singapore: The Encyclopedia. Singapore: Editions Didier Millet, 2007

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.