மலாய விளக்கம்

மலாய விளக்கம் (27 செப்டம்பர் 1914 – 25 டிசம்பர் 1914) நாளிதழ், தி மலாயா ட்ரிப்யூன் ஆங்கில நாளிதழின் சுருக்கப்பட்ட தமிழ்ப் பதிப்பாகச் சுமார் மூன்று மாதம் சிங்கப்பூரில் வெளிவந்தது. முதல் உலகப்போர் அவ்வாண்டு ஜூலை மாதம் தொடங்கியிருந்ததைத் தொடர்ந்து, ஆங்கிலம் அறியாத தமிழர்களும் போர் தொடர்பான செய்திகளைப் படித்துத் தெரிந்துகொள்ள விரும்பியதால், அவற்றின் மொழிபெயர்ப்பாக மலாய விளக்கம் வெளியிடப்பட்டது. அக்காலக்கட்டத்தில் வேறு தமிழ் நாளிதழ் எதுவும் சிங்கப்பூரிலிருந்து வெளியாகவில்லை என்றும் தெரிகிறது.

தி மலாயா ட்ரிப்யூனின் ஆசிரியர் செஸ்னி டங்க்கன் 1914-இல் மலாய் மொழியில் போர் தொடர்பான செய்திகளை மொழிபெயர்த்து மலாய் நாளிதழ் ஒன்றை வெளியிட்டார். அதைத்தொடர்ந்து தமிழ்ச் சமூகம் விடுத்த வேண்டுகோளை ஏற்று மலாய விளக்கத்தை வெளியிட்டார். டிரிப்யூன் வெளியிடப்பட்ட அதே 20A-20C காலியர் கீ முகவரியிலிருந்து, இரண்டு பக்க அளவில், மூன்று காசு விலையில் இதழ் வெளியானது. பிறகு 5 அக்டோபர் 1914 அன்றிலிருந்து நான்கு பக்க அளவில் ஐந்து காசு விலையில் வெளியானது.

“ஐரோப்பிய யுத்த செய்திகள்” மட்டுமின்றி, தலையங்கம், கட்டுரை, பத்திகள், உள்ளூர்ச் செய்திகள், வெளியூர்ச் செய்திகள், “பொது வர்த்தமானங்கள்” உள்ளிட்ட பல்வேறு தலைப்புகளில் செய்திகளும் படைப்புகளும் வெளியிடப்பட்டன. சந்தாதாரராகச் சேர ஆதரவுகோரி தொடர்ந்து சுமார் மூன்று மாதம் விளம்பரம் வெளியிட்டும் போதிய ஆதரவு கிட்டாததால், 25 டிசம்பர் 1914 அன்று, “நம்முடைய தமிழ் பத்திரிகையை ஆதரிக்கப் போதுமான தமிழ் நண்பர்கள் இல்லாமையால் இன்றோடு இப்பத்திரிகையை நிறுத்தலாயினோம்” என்ற அறிவிப்புடன் மலாய விளக்கம் நாளிதழ் நிறுத்தப்பட்டது.



மேல்விவரங்களுக்கு
திருமுருகானந்தம், கோட்டி. சிங்கப்பூர் இதழியல் வரலாறு. சென்னை: பாஸ் ஃபவுண்டேஷன், 2019
“‘Ourselves.” Malaya Tribune. 29 September 1914, 6. (From NewspaperSG)

To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.