தினகரன், ரா.

தினா என்று அழைக்கப்படும் ராமசாமி தினகரன், நியமன நாடாளுமன்ற உறுப்பினராக தேர்ந்தெடுக்கப்பட்டத் தமிழர்களில் ஒருவர். முப்பதாண்டுக்கும் மேற்பட்ட வர்த்தகத்துறை அனுபவமுள்ள அவர், துறையின் பிரதிநிதியாக, 2012 முதல் 2014 வரை அப்பதவியை வகித்தார். 

சிங்கப்பூரின் ஜே ஜீ குழுமத்தின் நிர்வாக இயக்குநரான தினகரன், பெருநிறுவன ஆடையலங்கார, அன்றாடப் பொருள்களின் சில்லறை விற்பனையில் நிபுணத்துவம் பெற்றவர். சிங்கப்பூர் சில்லறை விற்பனையாளர்கள் சங்கத்தின் தலைவராக 2016 முதல் 2022 வரை பணியாற்றினார். சிங்கப்பூர் அறநிறுவன மன்றம், சிங்கப்பூர் உற்பத்தித்திறன் மைய வாரியம் ஆகியவற்றின் உறுப்பினராகவும் இருந்தார். சிங்கப்பூர்ப் பட்டயக் கணக்காளர் கழகத் துணைத் தலைவராகவும், சிங்கப்பூர் இந்தியர் வர்த்தக, தொழில் சபையின் துணைத் தலைவராகவும், ஊழியரணி மேம்பாட்டு வாரியத்தின் துணைத் தலைவராகவும், ஸ்கில்ஸ் ஃபியூச்சர் சிங்கப்பூரின் துணைத் தலைவராகவும் பணியாற்றினார். பட்டயக் கணக்காளரும் வர்த்தக நிர்வாகத்தில் முதுகலைப் பட்டம் பெற்றவருமான அவர், சிங்கப்பூர் சமூக அறிவியல் பல்கலைக்கழக அறங்காவலர் குழு உறுப்பினராகவும் சிம் பல்கலைக்கழக வழிகாட்டுக்குழு உறுப்பினராகவும் கல்வித்துறையில் பங்களித்துள்ளார்.  

தினகரன் சமூகச் சேவையில் அதிக நாட்டமுள்ளவர். சமாதான நீதிபதி, இந்து அறக்கட்டளை வாரியத்தின் துணைத் தலைவர், இந்திய மரபுடைமை நிலைய ஆலோசனைக்குழு உறுப்பினர், தை ஹுவா குவான் அறப்பணி அமைப்பின் வாரிய உறுப்பினர் போன்ற பல பதவிகளில் பணியாற்றியுள்ளார். தமிழ் மொழி, கல்விக்காகக் குரல் கொடுப்பவராகப் பரவலாக அறியப்பட்டவர். தமிழ் மொழி நிகழ்ச்சிகளில் அடிக்கடி கௌரவ விருந்தினராகப் பங்கேற்பவர். 

தினகரனின் சாதனைகளுக்காக, 2013-இல் கலாசார, சமூக, இளையர் அமைச்சின் நண்பர் என்னும் விருதும் 2017-இல் தேசிய நாள் விருதாகப் பொதுப் பணிப் பதக்கமும் வழங்கப்பட்டன.



To read in English

முகப்புப் பக்கத்திற்குச் செல்ல

கலைக்களஞ்சியத்தைப் பற்றி

The information in this article is valid as of August 2025 and correct as far as we are able to ascertain from our sources. It is not intended to be an exhaustive or complete history of the subject. If you have any feedback on this article, please submit here.